Ky është i dyshuari për sulmin ndaj imamit në Kamenicë, e goditi me bisht sëpate

Pak më parë u raportua për një incident që ka ndodhur në fshatin Dajkoc të Kamenicës, ku një person dyshohet se ka sulmuar fizikisht imamin e xhamisë së fshatit, Driton Krasniqi, duke i shkaktuar atij lëndime trupore.

Sinjali mëson ekskluzivisht se i dyshuari është Lorent Krasniqi, 27-vjeçar.

Sipas informacioneve e gjithë ngjarja ka ndodhur para një shitoreje në fshatin Dajkoc, ku imami Krasniqi kishte shkuar që të bisedojë për disa dyshime që kishte për vjedhjen e disa druve në oborrin e tij.

27-vjeçari dyshohet se nuk e ka pritur mirë imamin dhe të njëjtin e ka sulmuar fizikisht duke e grushtuar, e më pas dyshohet se e ka goditur edhe me një bisht sëpate.

Si pasojë e sulmit, imami Krasniqi, ka pësuar lëndime trupore dhe ka kërkuar ndihmë mjekësore në spital. Pos viktimës, lëndime trupore ka marrë edhe i dyshuari dhe të njëjtit i është ofruar tretman mjekësor.

Me urdhër të prokurorit, i riu është dërguar në mbajtje dhe do të hetohet nën dyshimet për kryerjen e veprës penale ‘Lëndim i lehtë trupor’.

Rastin e ka konfirmuar edhe Policia e Kosovës.

“Është arrestuar i dyshuari mashkull kosovar pasi i njëjti pas një zënke verbale e kishte sulmuar viktimën mashkull kosovar. Si pasojë e sulmit viktima ka pësuar lëndime të lehta trupore për çka dhe i është ofruar tretman mjekësor. Me vendim të prokurorit, i dyshuari është dërguar në mbajtje”, thuhet në njoftimin e Policisë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.