Ky është i arrestuari për vrasjen dhe groposjen e Enver Bajraktarit

Policia e Kosovës ka arrestuar të martën në mëngjes të dyshuarin për vrasjen dhe groposjen e Enver Bajraktarit, burrit nga fshati Baicë e Lipjanit, i cili ishte shpallur i zhdukur më 4 gusht të këtij viti.

Sipas Sinjalit, i arrestuari është Top Kolshi, një banor i fshatit Baicë.

Rastin e ka konfirmuar sot edhe zëdhënësja e Policisë së Kosovës, Flora Ahmeti.

“Si rrjedhojë e angazhimeve intensive hetimore, sot nga Njësiti i Hetimeve të Përgjithshme – Prishtinë, është arrestuar një person i dyshuar: – T. K, mashkull, shtetas i Republikës së Kosovës, për rastin vrasje që ka ndodhur në fshatin Baicë të Lipjanit”.

“Aktualisht hetuesit po kryejnë procedurat e nevojshme policore, në koordinim me prokurorinë”, deklaroi Ahmeti.

Trupi i 45-vjeçarit Enver Bajraktari u gjet para gjashtë ditësh i groposur disa metra nën sipërfaqe dhe i mbuluar me disa dërrasa.

Grupi që po e kërkonte Bajraktarin ndoqi gjurmët, të cilat treguan se trupi ishte tërhequr me forcë drejt një gropë të improvizuar në një arë të mbjellë me misër disa metra nën sipërfaqe, ku ishin vendosur edhe disa dërrasa për ta kamufluar vendin e varrimit.