Ky është ariu polar që është alergjik ndaj qimeve të njeriut

Mund të duket e pazakontë, por edhe kafshët e egra që mbahen në robëri mund të zhvillojnë alergji – ndonjëherë edhe ndaj vetë njerëzve.

Në vitin 2018, stafi i kopshtit zoologjik Lincoln Park në Çikago vuri re se një ari polar mashkull, i quajtur Siku, po humbiste qimet dhe kruhej vazhdimisht. Pas ekzaminimeve, mjekët veterinarë zbuluan se shkaku i gjendjes së tij ishte alergjia.

Testet e lëkurës zbuluan se Siku ishte alergjik ndaj merimangave të shtëpisë, polenit të disa bimëve si elbi, mani dhe kedri i kuq – por ajo që habiti më shumë mjekët ishte fakti se ai reagoi fort edhe ndaj zbokthit të flokëve të njeriut, raporton BBC.

“Një nga gjërat që ai fillimisht tregoi një reagim shumë të fortë ishte zbokthi i flokëve të njeriut,” kujton Kathryn Gamble, drejtoreshë e mjekësisë veterinare në kopshtin zoologjik Lincoln Park.

Jo vetëm Siku – edhe dhelpra, majmunët dhe leopardët me alergji

Nuk është vetëm Siku që vuan nga alergjitë. Stafi i kopshtit ka hasur raste të ngjashme edhe te leopardët e zinj, dhelprat fenek, majmunët saki, makakët japonezë dhe arinjtë e zinj.

Sipas Andrew Flies, ekspert i alergjive tek kafshët, kjo është një nga ato raste ku përvoja njerëzore ndihmon për të kuptuar dhe trajtuar sëmundjet tek kafshët.

“Kjo është një nga ato situata të rralla ku ajo që kemi mësuar nga njerëzit mund të ndihmojë kafshët,” shprehet Flies.

Alergjitë po shtohen edhe te kafshët

Ekspertët mendojnë se shtimi i alergjive te kafshët lidhet me mënyrën e jetesës në robëri. Kafshët e fermave, ato shtëpiake dhe në kopshtet zoologjike, jetojnë në mjedise të kontrolluara nga njeriu, larg natyrës, ku nuk ekspozohen ndaj parazitëve dhe mikrobeve natyrale, që në mënyrë normale ndihmojnë sistemin imunitar të zhvillohet në mënyrë të ekuilibruar.

“Tek qentë dhe macet, numrat janë rritur dukshëm, dhe nuk do të çuditesha nëse edhe më shumë kafshë të kopshteve zoologjike po zhvillojnë alergji,” thotë Annette Petersen, dermatologe veterinare në Universitetin Shtetëror të Miçiganit.

Simptoma të ndryshme: te njerëzit rrjedh hundët, te kafshët irritohet lëkura.

Sipas dermatologut veterinar Andrew Rosenberg, shumë kafshë thithin alergjenët përmes lëkurës dhe jo përmes frymëmarrjes, çka bën që sëmundjet të shfaqen në mënyra të ndryshme nga ato që shohim te njerëzit.