Kuvendi sot do ta rrëzojë Bordin e RTK-së, Bordi reagon

Kuvendit i Republikës së Kosovës, në mbledhjen e sotme, në rend dite ka edhe Rekomandimin e Komisionit funksional për Administratë Publike, Qeverisje Lokale, Media dhe Zhvillim Rajonal për shkarkimin e Bordit të Radiotelevizionit të Kosovës.
Ditë më parë, ka reaguar Bordi i RTK-së duke thënë se:

“Votimi për shkarkimin e anëtarëve të Bordit të RTK-së, prodhon shkelje kushtetuese nga Kuvendi Kosovës, sepse një vendim i tillë është në kundërshtim me ligjin, shkel të drejtat kushtetuese të anëtarëve të Bordit të RTK-së, që rrjedhin nga mandati i tyre ligjor.
Iniciatorët e shkarkimit nuk argumentuan në asnjë prej pretendimeve të tyre se cilën detyrë anëtarët nuk e kishin përmbushur në Bordin e RTK-së. Një qasje e tillë, në aspektin material dhe procedural, e bën vendimin për të shkarkuar Bordin e RTK-së, të paligjshëm, politik, arbitrar dhe me pasoja afatgjate për transmetuesin publik.
Ndër të tjera, një procedurë e tillë e ndjekur për shkarkimin e anëtarëve të Bordit të RTK-së, e cila nuk është e përcaktuar me ligj, shkel të gjitha parimet themelore, të cilat përcaktohen nga ligjet në fuqi.

Bordi i RTK-së konsideron se, fushata politike kundër mediumit të vetëm publik në Kosovë , e konstruktuar mbi të pavërteta dhe pretendime të padëshmuara, synon ta instrumentalizojë transmetuesin publik për arsye politike.

Bordi i RTK-së ka qenë gjithmonë i hapur për t’i dhënë përgjigje Kuvendit të Kosovës, si themelues i RTK-së, për çdo çështje që lidhet me misionin e tij.

Për këtë veprim, Bordi i RTK-së përsëri do t’i njoftojë të gjithë mekanizmat vendorë dhe ndërkombëtarë, duke përfshirë EBU-në, OSBE-në si dhe misionet e tjera ndërkombëtare në Kosovë.”
Kryetar i Komisionit funksional për Administratë Publike, Qeverisje Lokale, Media dhe Zhvillim Rajonal është z. Armend Muja, ka qenë i akuzuar për marrje të ryshfetit në vazhdim dhe bashkëkryerje të veprimeve të kundërligjshme të për të cilat do të duhej të ndiqej penalisht. Po ashtu, sipas burimeve brenda RTK-së, Armend Muja nga RTK ka marrë së paku 5 mijë euro, nē kuadër të një projekti për trajnimin e gazetarëve, gjë që nuk e ka bërë kurrë.