Kusari: Sot ka filluar tentim shkatërrimi i bordit të RTK-së nga ana e VV-së

Juristja e mediave, Flutura Kusari, e cila ka monitoruar gjithë procesin e përzgjedhjes së anëtarëve të bordit të transmetuesit publik, thotë se partia në pushtet po tenton ta shkatërrojë bordin e RTK-së.

Po bëhet intervistimi i kandidatëve për të plotësuar bordin e Radio Televizionit të Kosovës. Kusari, e cila kishte përgëzuar zgjedhjen e anëtarëve të parë të bordit të ri, thotë se tani po tentohet të shkatërrohet ky bord.

“Procesi ka qenë jashtëzakonisht joprofesional (nga ana e deputetëve të shumicës) dhe jotransparent. Nivel i thellë i regresit në transprencë dhe organizim krahasuar me procesin e parë për zgjedhjen e anëtarëve të bordit të RTK-së në nëntor të vitit të kaluar, i cili ishte organizuar në mënyrë fantastike”, ka shkruar të hënën Kusari në Facebook.

Ajo thotë se intervistimi i kandidatëve është bërë në mënyrë joprofesionale dhe jomeritore. Kusari ka përmendur emrat e deputetëve, pjesë e komisionit ad hoc, të cilët, sipas saj, janë përgjegjës në vlerësimin joprofesional.

Shkrimi i plotë dhe pa ndërhyrje i juristes:

Sot ka filluar tentim shkatërrimi i bordit të RTK-së nga ana e VV-së.

Sot kam monitoru intervistimin e kandidatëve për anëtar të bordit të RTK-së (plotësim i bordit).

Procesi ka qenë jashtëzakonisht joprofesional (nga ana e deputetëve të shumicës) dhe jotransparent. Nivel i thellë i regresit në transprencë dhe organizim krahasuar me procesin e parë për zgjedhjen e anëtarëve të bordit të RTK-së në nëntor të vitit të kaluar, i cili ishte organizuar në mënyrë fantastike.

Poentimi i kandidatëve është bërë në mënyrë jotransparente dhe absolutisht jomeritore. Absolutisht jomeritore.

Po ashtu, intervistimi është bërë duke shkelur praktikën e britanikëve, meqë kandidatëve u janë bërë pyetje të ndryshme, metodë kjo që nuk lejon vlerësim objektiv dhe profesional dhe bëhet me agjendë të caktuar politike. Agjendë kjo që u dëshmua.

Është e papranueshme që në njërën anë të bëhet ftesë për aplikime në rekrutime publike duke premtuar meritokraci dhe duke ftuar profesionistë që të aplikojnë e në anën tjetër të montohen procese në të cilat kandidatët nuk vlerësohen në baza meritore.

Vetëm VV-ja ka aftësi që me e shkatërru punën e saj të mirë që e ka bo me RTK-në deri më tani.

Ky zhvillim do të pasqyrohet në detaje në të gjitha vlerësimet ndërkombëtare.

Deputetet përgjegjës janë: Fitim Hajrizi (kryetar i komisionit ad hoc), Arbëreshë Kryeziu, Njazi Isaku, Ergjan Galushi, Besim Muzaqi.

Vendim i drejtë i deputetes së AAK-së Albana Bytyqi dhe deputetit të LDK-së Agim Veliu që kanë paralajmëruar që nuk do ta nënshkruajnë procesverbalin.

Procesi duhet të përsëritet nëse VV nuk dëshiron që ta shkatërrojë punën e mrekullueshme që ka bo deri më tani me RTK.