Kusari: Projektligji i ri për KPM-në, tendencë për t’i kontrolluar mediat

Juristja e së drejtës së medias, Flutura Kusari, tha se projektligji për Këshillin e Pavarur të Mediave ka një mori problemesh.

Sipas Kusarit qëllimi i këtij projektligji është ushtrimi i kontrollit mbi mediat.

”Projektligji për KPM-në ka shumë probleme, por kryesori është ideja me i kontrollu mediat përmes regjistrimit që quhet vullnetar, por nuk është vullnetar apo licencimit, është e pamenduar mirë, nuk funksionon në praktikë, qëllimi është i keq, dhe jam e bindur se projektligji ka me u bo ligj, sepse ashtu ka vendosur partia dhe ashtu do të bëhet”, tha Kusari në Rubikon.

Kusari shtoi se edhe Shqipëria e kishte ndërmarrë iniciativën e njëjtë para disa vitesh, por se ishte tërhequr pas reagimit të organizatave ndërkombëtare, ndërsa shtoi së në Kosovë kalimi i këtij ligji tashmë është punë e kryer.

”Tri vjet të jetës ia kam përkushtu avokimit kundër një iniciative të njëjtë në Shqipëri, dhe ka qenë vështirë me bindë Edi Ramën që ai të tërhiqet nga kjo iniciativë, por ai u bind kur doli edhe Këshilli i Evropës, kur dolën të gjithë edhe BE-ja thanë nuk bën kështu. Te ne mesazhi te pushteti ka shku se është gabim, nuk duhet të bëhet. Ajo që unë e kuptova në dëgjim publik është se ata kanë vendosë, numrat i kanë dhe ligji do të bëhet”, tha Kusari.

Kusari renditi arsyet përse sipas saj ky ligj nuk mund të funksionoj në praktikë, dhe shtoi se i njëjti është hartuar fshehurazi, pa konsultime paraprake me shoqërinë civile.

”Në praktikë nuk mund të zbatohet, KPM-ja i ka 6-7 persona me i monitoru televizionet  dhe radiot, buxhetin nuk e kanë rritur, pra i bije KPM-ja me i monitoru të gjitha mediat online, kjo ka me shkaktu njëfarë kaosi në vetvete, që në fund mund të jetë e dëmshme, efekti të cilin e ka menduar kushdo që e ka pasur idenë e këtij ligji nuk ka me e mbërri, por faturën do ta paguajmë…qëllimi ka qenë i keq, s’mund të ketë asnjë ligj qëllim të mirë nëse është bërë fshehurazi, projektligji bëhet i mirë kur e bën një grup me shoqërinë civile, ky është standard bazik në demokraci”, tha Kusari në Rubikon të Klan Kosovës.

Kusari shtoi se heqja e nenit i cili ua ndalon partive politike dhe bashkësive fetare që të hapin televizione është një nga problemet e projektligjit të ri për KPM-në.

”Problemi tjetër është që aktualisht ligji për KPM ua ndalon partive politike edhe bashkësive fetare me hapë televizion, ky ligj nuk e lejon një parti e cila mund të ketë miliona që me hap një televizion dhe pastaj ai televizion me pasë më shumë ndikim sesa televizionet e pavarura, dhe atë nen e kanë heqë, kështu që ne do të kemi TV LVV, TV PDK,  TV LDK, TV AAK, TV BIK, etj kjo pritet të ndodhë dhe afati kohor është qershor kështu që së shpejti”, tha Kusari.