Kryeministri Albin Kurti në fjalën e tij në Kuvend ka folur për propozim-rezolutën e dënimit të Gjenocidit të Srebrenicës.
Kurti tha se po mbështetet kjo rezolutë sepse është veprim fisnik.
“Sot po e mbështesim një rezolutë me rastin e 26 vjetorit të gjenocidit në Srebrenicë. Ky është një veprim fisnik dhe i duhur e mbi të gjitha universales tonë njerëzore e dëshirës sonë për drejtësi. Gjenocidi në Srebrenicë është masakra më e madhe në Evropë pas luftës së dytë botërore. Për vit ne e kujtojmë Srebrenicën duke bërë thirrje për drejtësi. Në vitin 2016 unë shkova në Srebrenicë i ftuar nga Nënat e Srebrenicës.Srebrenica ishte e mbushur me varre e përkujtimore”, ka thënë Kurti.
Kryeministri Kurti ka pyetur se kush janë ata kriminelë që i fshehin trupat e vrarë.
Ai ka thënë se krimi në Srebrenicë ka marrë emër dhe nga Gjykata Ndërkombëtare e Drejtësisë është cilësuar si gjenocid, duke thënë se e njëjta gjë duhet të bëhet edhe për krimet në Kosovë.
“Ne kemi krimet në Kosovë, numrin e të vrarëve, grave të dhunuara, e dijmë edhe kush i ka bërë këto krime, por ende nuk kemi një emër për këtë krim. Andaj, Qeveria e Kosovës ka nisur me kujdes përgatitjen e padisë për gjenocid ndaj Serbisë, në mënyrë që krimet në Kosovë të kenë emër”, ka thënë Kurti.