Kurti ironizon me Opozitën: Po na zgjat qëndrimin në pushtet, dikush mund të mendojë se kemi marrëveshje

Kryeministri në detyrë, Albin Kurti, tha se po hyn në çerekun e dytë të vitit të pestë të mandatit të tij, ndërsa institucionet e reja ende nuk janë konstituuar pas zgjedhjeve të fundit.

Ai ka theksuar se ndryshe nga praktikat demokratike, opozita në Kosovë nuk po tenton të shkurtojë mandatin e qeverisë, por përkundrazi, po e zgjat atë.

Kurti tha se nuk ka një shpjegim të qartë për këtë sjellje institucionale dhe e quajti situatën të pakuptueshme.

Ai theksoi se sa më shpejt që të konstituohet Kuvendi me votim të fshehtë për kryesinë, aq më shpejt do të mund të formohet edhe qeveria e re.

“Ju gjithmonë e dini që kam hyrë në çerekun e dytë të vitit të 5-të të mandatit të plotë. Çdo opozitë demokratike përpiqet që t’ia shkurtojë mandatin qeverisë. Përveç opozitës kosovare, e cila, siç jeni dëshmitarë të gjithë ju, po ia zgjatë mandatin qeverisë Kurti.

Dikush edhe mund të mendojë që kemi marrëveshje. Pra, ne si qeveri në detyrë kemi marrëveshje me opozitën aktuale që të qëndrojmë sa më shumë në pushtet.

Por ju siguroj që kjo nuk është e vërtetë. Nuk kam shpjegim për këtë sjellje nëpër të cilën po kalojnë institucionet e Kosovës.

Ne, në bazë të nenit 31 të Ligjit për Qeverinë, kemi më pak kompetenca, por ne kemi njësoj shumë punë.

Sa më herët që e konstituojmë Kuvendin, duke e formuar me votim të fshehtë që po e provojmë tani kryesinë e Kuvendit, aq më shpejt do të jemi edhe te qeveria e re.

Ndërkohë që nuk ka qeveri të re, Kurti 3 ka qeveri në detyrë. Ky është realiteti që nuk kam çfarë t’i shtoj,” tha ai.