Kurti e Maqedonci takojnë ministrin estonez: Mbështetja e Estonisë për Kosovën është jetike

Kryeministri i vendit, Albin Kurti, së bashku me ministrin e Mbrojtjes, Ejup Maqedoncin, po marrin pjesë në Forumin e Varshavës për Siguri 2024.

Përmes një postimi në “X”, Kurti ka bërë të ditur se ditën e dytë të forumit e kanë nisur me një takim me homologun estonez, Hanno Pevkur.

Me ç’rast, kryeministri ka shkruar se gjatë takimit kanë diskutuar për sigurinë, derisa e ka cilësuar jetike mbështetjen e Estonisë për Kosovën.
“Me ministrin e Mbrojtjes Ejup Maqedonci e nisëm ditën tonë të dytë në Forumin e Varshavës për Siguri (ËSF) me një takim produktiv dhe gjithëpërfshirës me Ministrin e Mbrojtjes të Estonisë, Hanno Pevkur. Së bashku, ne riafirmojmë angazhimin tonë të përbashkët për paqen, sigurinë dhe bashkëpunimin. Mbështetja e Estonisë është jetike derisa ne forcojmë aftësitë mbrojtëse të Kosovës dhe kontribuojmë në stabilitetin rajonal”, thuhet në postimin e plotë të Kurtit.

Në kuadër të këtij forumi, Kurti dje tha se “siguria rajonale në Europë është siguri kolektive për Europën”.

“Ajo që ndodh në Ukrainë apo Poloni, në vendet e Partneritetit Lindor dhe në rajonin tonë të Ballkanit Perëndimor, prek jo vetëm kontinentin, por gjithë botën. Për ne në Ballkanin Perëndimor, e veçanërisht për Republikën e Kosovës, integrimi i plotë euroatlantik në NATO dhe Bashkimin Evropian, mbetet qëllimi përfundimtar i sigurisë. Kjo, krahas aftësive të mjaftueshme mbrojtëse dhe marrëveshjeve dypalëshe të sigurisë me aleatët tanë më të afërt, formon një ombrellë solide sigurie. Ashtu si Rusia, NATO dhe BE kanë një histori zgjerimi. Por ndryshe nga Rusia, zgjerimi i tyre ka ecur në një mënyrë paqësore dhe demokratike”, ka thënë dje Kurti.