Kryetari i ri i PDK’së: Do të bëj gjithçka që duhet që partia të rikthehet aty ku i takon

Kryetari i zgjedhur i Partisë Demokratike të Kosovës, Memli Krasniqi, përmes një shkrimi në llogarinë e tij në facebook, ka shprehur mirënjohje për delegatët e Konventës së Dhjetë të PDK’së, për besimin që ia dhanë për ta udhëhequr partinë më të madhe opozitare në vend.

Krasniqi tha se do të bëjë gjithçka që duhet për PDK’në, në mënyrë që kjo parti të rikthehet, sipas tij, aty ku i takon.

Krasniqi konsideron se PDK’ja është adresa politike kryesore për qytetarët e vendit, dhe partia më e fuqishme dhe me viznionin më të qartë për vendin.

“Familja jonë e përbashkët politike po nisë një kapitull të ri siç i ka hije, duke respektuar pafundësisht të kaluarën, të tashmen dhe kontributin e secilit. Por, gjithmonë duke shikuar kah e ardhmja”, ka thënë Krasniqi.

Gjatë votimit për zgjedhjen e tij kryetar, 476 delegatë votuan, 7 nga ta kundër dhe një abstenim. Krasniqi u zgjodh kryetar i PDK’së pa kundërkandidat.

Më poshtë gjeni shkrimin e plotë të Krasniqit:

Ju shpreh mirënjohje të pafund të gjithë delegatëve të Konventës së Dhjetë të Partisë Demokratike të Kosovës për besimin, votën dhe mbështetjen që ma dhanë sot, për të udhëhequr partinë tonë në dy vjetët e ardhshme.

Familja jonë e përbashkët politike po nisë një kapitull të ri siç i ka hije, duke respektuar pafundësisht të kaluarën, të tashmen dhe kontributin e secilit. Por, gjithmonë duke shikuar kah e ardhmja.

PDK është parti e njerëzve të mirë të Kosovës – e çlirimtarëve e patriotëve, intelektualëve e vizionarëve, mësuesve e profesorëve, mjekëve e infermierëve, artistëve e sportistëve, ndërmarrësve e mërgimtarëve, fermerëve e punëtorëve, grave e burrave që synojnë një jetë të dinjitetshme dhe një shtet që i bën krenarë.

Do të bëj gjithçka që duhet – që PDK të rikthehet aty ku i  takon, si partia më e fuqishme dhe me vizionin më të qartë për vendin. Si adresa politike kryesore për qytetarët tanë.

Dhe për të arritur këtë qëllim, e konsideroj fundamental unitetin tonë të rikonfirmuar sot për rrugën para nesh, për nevojën e çlirimit dhe mobilizimit të potencialit tonë të brendshëm dhe bashkëdyzimit të tij me vlerat dhe energjitë e reja që do bashkohen me ne në këtë projekt të ri politik për PDK-në.