Kryesia mblidhet nesër, PDK dhe LDK nuk shkojnë – e cilësojnë antikushtetuese

Kryesia e Kuvendit të Kosovës, ani pse jo plotësisht e plotësuar, do të mbajë mbledhje nesër, e hënë, nga ora 13:00.

Kryekuvendari, Dimal Basha e thirri këtë takim, pas dështimit të zgjedhjes së nënkryetarit të pestë të Kuvendit, nga radhët e komunitetit serb.

Por kësaj mbledhje i thanë “JO”, Lidhja Demokratike e Kosovës dhe Partia Demokratike e Kosovës.

Ishte shefja e Grupit Parlamentar të LDK-së, Hykmete Bajrami që bëri të ditur vendimin e partisë, për mospjesëmarrje në këtë takim.

“Jo, absolutisht sepse konsiderojmë që çdo gjë që ndodh pas mbylljes arbitrate të seancës, pa konstituim të Kuvendit, është antikushtetuese. Nuk do të marrim pjesë”, ka thënë Bajrami, njofton Klankosova.tv.

Nga ana tjetër, PDK ka thënë se mbledhja e Kryesisë së Kuvendit, e thirrur për të hënën, është e pakuptimtë, dhe për pasojë tha se nuk do të marrë pjesë në të. Arsye bazë, sipas PDK-së, është fakti se Kuvendi nuk është konstituuar ende.

PDK-ja tha se vlerëson se zvarritjet e qëllimshme në procesin e themelimit të institucioneve shtetërore, “të shkaktuara nga VV-ja, janë skajshmërisht të rrezikshme për Kosovën. Sot, Kryetari i Kuvendit shpalli të përfunduar konstituimin e Kuvendit të Republikës së Kosovës, pa u zbatuar në tërësi Neni 67 i Kushtetutës së Kosovës. Për Partinë Demokratike të Kosovës, Kuvendi ende nuk është i konstituuar, sepse nuk është zgjedhur Kryesia e tij në përbërjen e plotë kushtetuese. Në këto rrethana, PDK e konsideron të pakuptimtë ftesën për takim të Kryesisë së Kuvendit që nuk është konstituuar dhe nuk merr pjesë në takime të tilla, të cilat i shërbejnë vetëm agjendave partiake e jo interesit të shtetit”, thuhet në komunikatën e PDK-së.