Krejt çka dihet deri më tani për tragjedinë në Podujevë, ku babai dyshohet se vrau djalin e tij me kallash

Disa të shtëna me armë zjarri prishën qetësinë në mbrëmjen e së hënës në fshatin Peran të Komunës së Podujevës.

Zhurmat e kallashit traumatizuan banorët e këtij fshati, e që tragjedia dyshohet të ketë ndodhur brenda një familje.

Motivet të cilat ende nuk janë të konfirmuara, por që raportohen se janë për shkaqe pronësore dyshohet se të kenë shtyrë edhe Naim Ismajlin me profesion zjarrfikës, të qëlloi me kallashnikov në drejtim të djalit të tij, Edon Ismajli.

Njësitet policore me të marrë informatën kanë dalur në vendngjarje, e që të cilët qysh nga ora 18:00 janë duke hetuar rastin.

Kështu të paktën është shprehur për GazetënDemos zëdhënësi i Policisë për Rajonin e Prishtinës, Agron Borovci.

“Rreth orës 18:00, është raportuar për të shtëna me armë zjarri në fshatin Peran të komunës së Podujevës. Policia ka dalë në vendin e ngjarjes dhe mbështetur në të dhënat e para, bëhet e ditur se një person, ka humbur jetën si pasojë e plagëve të marra nga arma zjarrit. Vdekja e viktimës është konstatuar nga ana e mjekëve emergjent. Policia ka iniciuar një hetim me synim sqarimin e të gjitha rrethanave që karakterizojnë rastin”, ka pohuar ai.

Ky rast tragjik vie një ditë pas atij të ditës së diel, ku po në Podujevë u përdorën armët, e si pasojë e tyre një person mbeti i plagosur, ku i cili po trajtohet tani më në QKUK.

“Rreth orës 20:00, është pranuar informacioni për të shtëna me armë zjarri në rrugën “Zahir Pajaziti” në Podujevë. Policia ka dalë në vendin e ngjarjes dhe mbështetur në të dhënat e para, bëhet e ditur se një person, ka marrë plagë nga arma zjarrit. I njëjti është dërguar në QKUK për të marrë trajtimin e nevojshëm mjekësor. Aktualisht hetuesit policor kanë nisur një hetim për sqarimin e të gjitha rrethanave që karakterizojnë rastin”, thuhej në njoftimin e Policisë së Kosovës.