Krasniqi për vdekjen e Sabri Popajt: Një shqiptar i rrallë, që dhembjen personale e ktheu në triumf e frymëzim kombëtar

Ka vdekur Sabri Popaj, nga fshati (Fortesë) ish-Bellacerk e komunës së Rahovecit.

Ai njihet për dëshminë e bërë në vitin 2003 kundër “Kasapit të Ballkanit” Sllobodan Millosheviq.

Kreu i Partisë Demokratike të Kosovës (PDK), Memli Krasniqi ka reaguar duke thënë se do të mungohet dhe kujtohet përgjithmonë.

Ai tha se me 25 mars të vitit 1999, në masakrën e Fortesës së Rahovecit, Sabri Popajt ia ekzekutuan dy djemtë e mitur.

“Lamtumirë Sabri Popaj!
Me 25 mars të vitit 1999, në masakrën e Fortesës së Rahovecit, Sabri Popajt ia ekzekutuan dy djemtë e mitur. Përveç Shëndetit dhe Agonit, në po atë masakër, atij ia vranë edhe vëllaun, nipat e shumë kushërinj e fqinj. Megjithatë, disi, ai kishte gjetur kurajon të bëhej i fortë, duke i varrosur secilin prej tyre gjatë natës.
Që nga ajo ditë, daja Sabri, siç e thërrisja, ishte shndërruar në një testament të gjallë të dhembjes e qëndrueshmërisë së shpirtit tonë shqiptar. Forcën ai e gjeti në luftën për drejtësi, të cilën e kërkoi për djemtë dhe familjarët deri në frymën e fundit. E kërkoi edhe në Hagë, në dëshminë e tij monumentale kundër kasapit të Ballkanit, Sllobodan Millosheviq.
Sabri Popaj ishte një shqiptar i rrallë, që dhembjen personale e ktheu në triumf e frymëzim kombëtar. Një patriot e veprimtar, atdhetar e luftëtar i lirisë në Ushtrinë Çlirimtare të Kosovës.
Daja Sabri, ti ike pa e marrë atë që të takonte mbi gjithçka: një copë drejtësi hyjnore. E me gjithçka që kemi, pjesën tjetër të rrugës në këtë betejë për të drejtën tonë historike, do ta bëjmë ne të tjerët që na le pas.
Lamtumirë, njeri i mirë! Do të na mungosh dhe do të të kujtojmë përgjithmonë!”, ka shkruar ai.