Kosova pjesë e ”Camprep24”, Maqedonci: FSK krenaria jonë

Ministri i Mbrojtjes, Ejup Maqedonci ka publikuar disa fotografi të FSK-së dhe Forcës së Sigurisë së Shqipërisë gjatë përgatitjeve për garën “Cambrian Patrol 2024”, shkruan GazetaDemos.

Maqedonci thotë se skuadrat treguan disiplinë, motiv e përkushtim të lartë, duke përfaqësuar vendet tona në garën më të madhe të ushtrive të botës.

“FSK, Krenaria jonë!”, përfundoi ai.

Postimi i plotë i tij:

FSK e gatshme për garën “Cambrian Patrol 2024”

Në kuadër të përgatitjeve për pjesëmarrje në garën “Cambrian Patrol 2024”, skuadra e Forcës së Sigurisë së Kosovës dhe një skuadër nga Forcat e Armatosura të Republikës së Shqipërisë në koordinim me Ambasadën e Mbretërisë së Bashkuar dhe me qëllim vlerësimin e skuadrave pjesëmarrëse në garë, kanë realizuar ushtrimin fushor “ Camprep24”, ku skuadrat kaluan sfidat e ngjashme me të cilat do të ballafaqohen gjatë realizimit të garës.

Skuadrat treguan disiplinë, motiv e përkushtim të lartë, duke bërë më të mirën për të përfaqësuar vendet tona në garën më të madhe të ushtrive të botës siç është gara “Cambrian Patrol”, që realizohet çdo vit në Mbretërinë e Bashkuar dhe me pjesëmarrjen e një numri të madhe nga të gjitha vendet e botës.

FSK, Krenaria jonë!