Kongresmeni amerikan: Dialogu është kthyer në shpatë që Serbia po e përdor si armë kundër Kosovës

Kongresmeni amerikan, Ritchie Torres ka thënë se dialogu Kosovë-Serbi është kthyer më shumë në një shpatë se sa në një mburojë.

Sipas tij, në vend që dialogu të veprojë si mburojë që mbron pavarësinë e Kosovës, është kthyer në shpatë që po përdoret si armë kundër Kosovës.

Tutje ai deklaroi se në një kohë kur ndikimi i ShBA-ve është në rënie, ajo nuk duhet t’i marrë si të mirëqenë aleatët e saj, përfshirë Kosovën.

“Ne po jetojmë në një kohë ku ndikimi i Shteteve të Bashkuara mund të jetë në rënie dhe ne nuk mund t’i marrim aleatët tanë si të mirëqenë. Ne duhet të jemi proaktivë në ruajtjen e aleancave tona”, është shprehur kongresmeni amerikan në një intervistë për Inside Albania.

Torres tha se Vladimir Putin është figura më popullore në Serbi dhe se një politikë e pajtimit me Serbinë nuk ka gjasa të rrisë ndikimin e SHBA-së apo BE-së brenda Serbisë.

“Kur shkoj në Kosovë, ka një ndjenjë të thellë mirëkuptimi dhe besnikërie ndaj Shteteve të Bashkuara. Me shaka kam thënë se në Kosovë ka më shumë dashuri për Shtetet e Bashkuara sesa në Shtetet e Bashkuara. Pse do ta hidhnim poshtë këtë mirëkuptim?”, ka shtuar Torres.

“Prioriteti më i lartë duhet të jetë sigurimi i njohjes së Kosovës si shtet i pavarur dhe integrimi i Kosovës së pari në Bashkimin Evropian dhe NATO e në fund të fundit në bashkësinë ndërkombëtare. Kjo duhet të mbetet politika e Evropës dhe e Shteteve të Bashkuara”, ka përfunduar ai.