Konfirmon Prokuroria Themelore e Mitrovicës, nënkryetarja serbe e Leposaviqit do hetohet

Prokuroria Themelore në Mitrovicë ka dhënë dritën jeshile për hetimin e rastit ku nënkryetarja serbe e Komunës së Leposaviqit shihet të konsumonte substancë e cila dyshohet të jetë drogë.

Këtë e konfirmon vet Prokuroria në një njoftim të saj.

Sipas pamjeve të publikuar nga Nacionale, dyshohet se këtë vepër nënkryetarja serbe e Leposaviqit, e kreu në ambientet e zyreve të objektit komunal, bashkë me një pjesë të stafit të saj.

”Prokuroria Themelore në Mitrovicë njofton opinionin se përkitazi me publikimin e video incizimit të portalit Nacionale, publikuar me datë 29 janar 2024, me qëllim të ndriçimit të gjitha fakteve dhe rrethanave, ka autorizuar Policinë e Kosovës – Drejtorinë për Hetimin e Trafikimit me Narkotikë (DHTN) në Prishtinë, që të ndërmarrë të gjitha veprimet hetimore lidhur me hetimin e këtij rasti, që ka të bëjë me persona të përfshirë që shihen në videot e publikuara, përfshirë identifikimin e të gjithë personave, pastaj mbledhjen e provave – video incizimeve të portalit Nacionale, dhe provave tjera relevante që janë të nevojshme për hetimin dhe ndriçimin e këtij rasti, në drejtim të veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” nga neni 267 lidhur me nenin 275 paragrafi 1 pika 1.2 të Kodit Penal të Republikës së Kosovës”.