Konfirmohet vendi dhe data për trilogjinë, Fury – Usyk

Tyson Fury (34-2-1) ka njoftuar zyrtarisht rikthimin e tij në ring, duke konfirmuar një ndeshje të tretë kundër kampionit ukrainas Oleksandr Usyk (23-0) më 18 prill 2026 në stadiumin “Wembley” të Londrës. Lajmi u bë publik nga vetë boksieri britanik në rrjetet sociale dhe u konfirmua menjëherë nga mediat e boksit.

Ky njoftim vjen disa muaj pas tërheqjes së Furyt nga boksi profesionist, pas dy humbjeve radhazi nga Usyk – të vetmet në karrierën e tij. Ai e kishte përmbyllur karrierën me fjalë mirënjohjeje, por kishte lënë të hapur mundësinë për një rikthim të madh.

Ndeshja e parë mes tyre u zhvillua në maj 2024 në Riad, ku Usyk fitoi me vendim të ndarë, duke u bërë kampioni i padiskutueshëm i peshave të rënda – një arritje që nuk ishte parë që nga koha e Lennox Lewis. Përballja e dytë ndodhi në dhjetor po atë vit, ku Usyk triumfoi bindshëm me vendim unanim.

Të dyja duelet ishin të forta dhe teknikisht të nivelit të lartë. Në përballjen e parë, Fury pati momente të mira në raundet e mesme, por Usyk përmbysi gjithçka në raundet e fundit.

Në ndeshjen e dytë, ukrainasi dominoi taktikisht, ndërsa Fury u duk më i ngadaltë dhe më pak energjik.

Pas humbjes së dytë, Fury u tërhoq nga boksi në fillim të vitit 2025, por shumë analistë dyshuan në përfundimësinë e vendimit. WBC deklaroi publikisht se dyert për një rikthim do të qëndronin të hapura për të, veçanërisht nëse dëshironte të kërkonte revansh.

Në javët e fundit, Fury kishte lënë të kuptohej se e vetmja ndeshje që do ta kthente në ring do të ishte një e tretë me Usyk.

“Dua ta marr hakun para tifozëve të mi në Wembley. Dy ndeshjet e kaluara nuk u gjykuan drejt,” kishte deklaruar ai.

Trilogjia Fury-Usyk është tashmë një nga ngjarjet më të pritura në botën e boksit. Para kësaj ndeshjeje, Usyk do të mbrojë titullin më 19 korrik ndaj Daniel Dubois, po ashtu në Wembley.

Nëse fiton, përballja e tretë me Fury do të përcaktojë pa diskutim mbretin absolut të peshave të rënda.

Organizatorët presin një interesim të jashtëzakonshëm dhe një stadium të mbushur plot. Me dy emra të mëdhenj të ringut, kjo trilogji pritet të hyjë në histori si një nga më të mëdhatë e epokës moderne të boksit.