Konfirmohet dënimi me 5 vjet burg për shkrimtarin franko-algjerian, Boualem Sansal

U konfirmua në Apel dënimi me pesë vite burg për Boualem Sansal, shkrimtarin franko-algjerian që ndodhet në burg prej më shumë se shtatë muajsh, i arrestuar në mënyrë të papritur në fund të nëntorit të kaluar, sapo kishte mbërritur në aeroportin e Algjerit.

Vendimi i ri është dhënë nga gjykata e kryeqytetit. Ashtu si në Shkallën e Parë, edhe kësaj radhe prokurori kishte kërkuar dhjetë vite burg. Pra, mund të kishte shkuar edhe më keq për Sansal, i cili prej kohësh vuan nga kanceri. Megjithatë, në orët para të shpalljes së vendimit, në Algjer qarkullonin zëra se gjykatësit këtë herë mund të tregonin më shumë mëshirë.

Për më tepër, herë pas here dalin sinjale se presidenti Abdelmadjid Tebboune mund të vendosë ta falë atë. Por këto shpresa vazhdimisht rrëzohen nga faktet, ndoshta edhe nga pasqyrimi i tendencave dhe vullneteve të kundërta brenda regjimit autoritar të këtij vendi, që historikisht dominohet nga ushtria (dhe që sot është një aleat i ngushtë i Italisë, gjithnjë e më shumë e varur nga furnizimet me gaz algjerian).

Ndër akuzat më të rënda ndaj Sansalit është ajo për “sulm ndaj unitetit kombëtar”, që vjen nga disa deklarata të tij mbi një çështje tejet delikate për Algjerin: ajo e Saharasë Perëndimore. Algjeria, një ndër mbrojtëset e pakta të mbetura të çështjes së Saharawive, ndodhet në krizë diplomatike me Francën për këtë temë, pasi Parisi ka pranuar në mënyrë de facto sovranitetin e Marokut mbi ish-koloninë spanjolle.

Sansal kishte deklaruar për median franceze të ekstremit të djathtë Frontières se Algjeria kishte trashëguar territore nga kolonializmi francez që më parë i përkisnin Marokut. Përveç pesë viteve burg pa kusht, dënimi përfshin edhe një gjobë prej 500 mijë dinarësh algjerianë (rreth 3500 euro).

Megjithatë, menjëherë para vendimit, disa sinjale dukeshin se tregonin një qëndrim më të butë nga autoritetet algjeriane. Avokati francez i Sansalit, Pierre Cornut-Gentille, kishte arritur në mënyrë të papritur të merrte vizë për të udhëtuar nga Parisi në Algjeri, dhe të hënën pasdite kishte mundur ta takonte klientin e tij.

Botuesi i vjetër i Sansalit, Antoine Gallimard, kishte konfirmuar se të dy ishin takuar për një orë dhe se “Boualem, në përgjithësi, është në gjendje të mirë shëndetësore, trajtohet mirë në burg dhe është i fortë moralisht.” Gallimard kishte treguar gjithashtu se strategjia e mbrojtjes është që Sansal të pranojë vendimin dhe të mos bëjë rekurs të ri, në mënyrë që presidenti Tebboune të ketë mundësinë ta falë.

Shkrimtari është 80 vjeç dhe vuan nga kanceri i prostatës. Ndërkohë, është hapur një krizë e re mes Francës dhe Algjerisë. Që nga e diela, ndodhet në burg në Tizi Ouzou, në rajonin berber të Kabilisë në lindje të Algjerit, Christophe Gleizes, 36 vjeç, shtetas francez dhe gazetar sportiv i pavarur. Të njëjtën ditë, ai u dënua në shkallën e parë me shtatë vite burg pa kusht.

Me një vizë turistike, Gleizes kishte shkuar në zonë në maj të vitit 2024 për të dokumentuar historinë e skuadrës JSK (Jeunesse Sportive de Kabylie). Ai u arrestua me akuzën se kishte hyrë në kontakt me një drejtues të klubit, që është njëkohësisht edhe figurë udhëheqëse e MAK-ut (Lëvizja për Vetëvendosjen e Kabilisë), e cila prej vitit 2021 është klasifikuar si “terroriste” nga autoritetet algjeriane.

Që nga arrestimi, Gleizes kishte qëndruar në Algjer nën mbikëqyrje gjyqësore. Jetonte në një hotel, me detyrimin për të raportuar disa herë në javë në komisariat dhe me ndalim për të lënë vendin. Por pas vendimit të së dielës, ai u fut menjëherë në burg. Një çështje e re e ndërlikuar për marrëdhëniet gjithnjë e më të tensionuara mes Parisit dhe Algjerit.