Komuna e Podujevës blen 180 mëshqerra për 351 mijë euro

Tenderi i hapur nga Komuna e Podujevës për të furnizuar fermerët me mëshqerre është fituar nga kompania e vetme e cila kishte aplikuar.

Vlera e dhënies së kontratës është 351 mijë euro, rreth 22 mijë euro më shumë se sa vlera e parashikuar kur ishte hapur tenderi fillimisht.

Komuna e Podujevës kishte paraparë rreth 328 mijë euro për këtë tender që ishte hapur më 17 janar.

Me çmimin e parashikuar, Komuna e Podujevës kërkonte të blejë 180 mëshqerra, me çmimin për copë prej 1 mijë e 825 eurove, ndërsa me vlerën e kontratës së dhënë do të paguajë 1 mijë e 950 euro për copë.

Njoftimi për dhënie të kontratës është publikuar në faqen e-prokurimi të premten.

Operatori ekonomik që ka aplikuar dhe fituar tenderin është “Sami Ferizi B.I.”, nga Vushtrria.

Në dosjen e tenderit specifikohen edhe ‘kriteret’ se çfarë lloji i lopës duhet të jetë.

Në tender kërkohet që lopa të jetë e racës ‘kuq e bardh’, me veti të kombinuara qumësht – mish dhe të ardhura nga importi nga Bashkimi Evropian.

Mosha e lopëve duhet të jetë prej 24-30 muaj, nga momenti i shpërndarjes. Masa trupore duhet të jetë 500 – 550 kg. Të gjitha lopët duhet të jenë barrëse 5 deri në 7 muaj”, thuhet ndër të tjera në dosjen e tenderit.

Po ashtu, dosja specifikon se lopët duhet të jenë të lira nga sëmundjet dhe deformimet e ndryshme, si dhe t’i kenë analizat e nevojshme të parapara nga AUV-i, deri sa janë në karantinë.

“Secila lopë duhet të jetë e shënuar në librin amë, të posedojë pedigre zyrtare dhe certifikatën e performancës të cilat duhet t’i ofrohen blerësit”, thuhet tutje në dosjen e tenderit.

Gjithashtu, një kriter tjetër është që lopët të arrijnë të shëndosha dhe t’i plotësojnë të gjitha kushtet e parapara në kontratë.

Zëdhënësi i Komunës së Podujevës, Fatri Zhitia, kishte thënë se ky projekt është duke u realizuar në formë të subvencionimit nga ana e drejtorisë së Bujqësisë, Pylltarisë dhe Zhvillimit Rural.

“Gjithsej janë planifikuar përmes këtij projekti të shpërndahen 180 mëshqerra barrëse për fermerët llapjanë.

Fermerët përfitues do të participojnë me 30% të vlerës, ndërsa 70% e vlerës së mëshqerrave e mbulon komuna”, ka bërë të ditur Zhitia.