Kollçaku tha se Abdixhiku do koalicion me LVV-në, Gashi: S’po më duket interesante

Shefit të Grupit Parlamentar të LDK-së, Arben Gashit, nuk i është dukur interesante deklarata e deputetes së LVV-së, Fatmire Kollçaku, e cila pak më parë theksoi se kryetari i Lidhjes Demokratike të Kosovës, Lumir Abdixhiku duket se po dëshiron të hyjë në koalicion me Lëvizjen Vetëvendosje, raporton Paparaci.

I kontaktuar nga Paparaci, Gashi të martën tha se nuk e ka parë se çfarë ka deklaruar kolegia e tij nga radhët e LVV-së.

Për më tepër, ai shtoi se nuk është e arsyeshme për të që të merret me këtë çështje.

Ndërkohë, pjesën se Abdixhikut i ka ikur treni që të bashkohej me listën ‘Guxo’ që është themeluar nga Vjosa Osmani, tanimë presidente, Gashi nuk e ka komentuar fare.

“S’po e shoh të arsyeshme të merrem me këtë çështje. Nuk e kam parë dhe s’po më duket interesante”, theksoi ai për mediumin, në një bisedë telefonike.

Ditën e sotme, nënkryetarja e LVV-së, Fatmire Kollçaku i ka reaguar kreut të LDK-së, Lumir Abdixhiku, i cili të hënën në një studio televizive u shpreh se kryeministri Albin Kurti në variantin më të mirë do të ishte ministër i tij i Punëve të Brendshme.

Në anën tjetër, sipas saj, Abdixhiku në mënyrë tërthorazi po dëshiron që të futet në koalicion me LVV-në e udhëhequr nga Albin Kurti.

“Kjo është mënyrë e tërthortë e Lumirit që të thotë se dëshiron të hyjë në koalicion me LVV. Mirëpo, ka ikur ky tren. Lumiri është dashur t’i bashkohet Vjosës, por, për atë hap nuk guxoi”, ka shkruar ajo sot në Facebook.