Kica-Xhelili për akuzat e VV-së, pas rritjes së LDK-së me vota në diasporë: Le t’i çmendin

Njëra nga kandidatët më të votuara për deputete nga rradhët e LDK-së Doarsa Kica-Xhelii ka shkruar pas akuzave që eksponent të VV-së kanë paraqitur kundër numrit të votive që LDK fitoi në diasporë. Kica-Xhelili ka shkruar se synonin më shumë se kaq, ndërsa për eksponentët e VV-së që po akuzojnë ka thënë se këto vota “le t’ju pengojnë e le t’i çmendin ata”.

E plotë:

Nga 40 mijë votues të LDK, të regjistruar e të deklaruar si votues tanët në degët tona në mërgatë, kanë votuar gjysma e tyre (rreth 20 mijë).

Tejet falënderues, megjithatë, ne kishim pritur më shumë! Degët e strukturat tona ishin angazhuar masivisht që në mërgatë t’i kthehej vota LDK-së, por arritëm përgjysmë rezultatin e synuar.

Por, pavarësisht që na u realizuan vetëm gjysma, edhe kjo po i pengon partisë në pushtet.

Nuk i penguan 80% e votës për VV në konsulata;

Nuk i penguan votat që i mbante lartë e poshtë Martini;

Nuk i penguan fletëvotimet për VV pa vule, e as dyshimet mbi trenin bulgar në plot komuna;

Nuk i pengonte Ministrja Gërvalla që përmes përfaqësive diplomatike organizonte tubime partiake;

Nuk po i pengon as tani kur eksponentë të VV e burri i ministres së drejtësisë sorollaten nëpër QNR si në bashqe, e kërkojnë nga zyrtarët e LDK të dalin jashtë “për t’i dalë fer”, si rrugaqë që vetëm në institucione publike s’e kanë vendin.

Por ama, atyre po i pengon që rreth 20 mijë vota të mërgatës i mori LDK.

Epo ja, le t’i pengojnë; le t’i çmendin!

Vota e mërgatës për LDK do të mbrohet nga akuzat e pabaza, sikurse u mbrojtën votat e LDK nga eksponentë të VV që shanin e ofshanin nëpër QNR t’i anulonin votat tona me çdo kusht.

Ngritja jonë prej 70 mijë votash është vetëm fillimi i ringritjes sonë! Dhe ata do të shajnë e ofshajnë për çdo rritje e ngritje tonën.