Këshilltarja politike në Ministrinë e Drejtësisë, Nazlie Bala, ka përkrahur deputeten e VV-së Jetmire Vrenezi, e cila u dënua me tri vite burg për keqpërdorim të detyrës zyrtare. Bala thotë se Vrenezi po mbronte pronën publike.
Ajo këto deklarata i ka bërë në ‘Facebook’-un e saj, duke sulmuar gjyqësorin dhe duke thënë se një vendim i këtillë është, siç e quan ajo, mbrojtje e uzurpatorëve.
“Deputetja dhe ish zyrtarja Jetmire Vrenezi u dënua me tri vite burg për shkak se ajo mbrojti pronën publike…aq ishin veprimet e saja”, deklaroi ajo.
“Vendimi i sotëm është në fakt mbrojtje e uzurpatorëve dhe ndëshkim i atyre që mbrojtën interesin publik”, vazhdoi më tej ajo.
Postimi i plotë:
Prona publike është e shenjtë, po ashtu mbrojtja e saj është legjitime dhe ligjore. Heshtja karshi uzurpimit dhe degradimit të pronës publike, është bashkëpunim me krimin.
Deputetja dhe ish zyrtarja Jetmire Vrenezi u dënua me tri vite burg për shkak se ajo mbrojti pronën publike…aq ishin veprimet e saja.
Dënime të tilla nuk kemi parë asnjëherë ndaj zyrtarëve të cilët për vite radhazi janë pasuruar kundërligjshëm dhe kanë keqpërdorur detyrën zyrtare.
Vendimi i sotëm është në fakt mbrojtje e uzurpatorëve dhe ndëshkim i atyre që mbrojtën interesin publik.