Kërkesa e mbrojtjes së Veselit dhe e Bahtijarit, nga Gjykata e Hagës dalin me njoftim

Zëdhënësja e Dhomave të Specializuara të Kosovës në Hagë, Angela Griep, gjatë konferencës javore për media, ka ndarë informacione sa i përket zhvillimeve të fundit në proceset gjyqësore.

Ajo njoftoi se më 28 shkurt, në çështjen që përfshinë Sabit Januzin, Ismet Bahtijarin dhe Haxhi Shalën, Kryetarja e Dhomave të Specializuara shqyrtoi kërkesën për sqarim të Bahtijarit, i cili kishte pretenduar se nuk ishte informuar në kohë për uljen e dënimit të tij.

“Kryetarja Trendafilova konkludoi se Bahtijari kishte marrë të gjitha informacionet e nevojshme, duke përfshirë kopje të kushteve të vendimit në gjuhën shqipe. Kërkesa e tij u hodh poshtë dhe mbrojtëses së tij iu urdhërua që të dorëzonte versionin e redaktuar të kërkesës deri më 6 mars 2025”, tha ajo.

Në lidhje me çështjen Thaçi dhe të tjerët, Griep njoftoi se më 3 mars, trupi gjykues refuzoi kërkesën e Mbrojtjes së Veselit për apelimin e një vendimi që nuk pranoi një dokument si provë.