KEK me njoftim: Njësia A3 rikthehet në operim

Korporata Energjetike e Kosovës ka njoftuar opinionin publik se njësia A3 e Termocentralit “Kosova A”, për të cilën dje njoftoi se ishte ndalur në mënyrë të paplanifikuar, është rikthyer në operim sot rreth orës 08:00.

“Rikthimi i njësisë është mundësuar falë reagimit të menjëhershëm dhe angazhimit profesional të stafit të Termocentralit “Kosova A”, të cilët kanë punuar pandërprerë, përfshirë edhe ndërrimin e tretë. Procesi i startimit ka filluar në orët e para të mëngjesit, ndërsa sinkronizimi me rrjetin është realizuar rreth orës 08:00. Aktualisht, njësia A3 është në operim të rregullt dhe gjendja e saj është stabile”.

Ndërkaq, dje përveç njësisë A3, KEK tha se njësia A4 e TC Kosova A ndodhet në remont që nga data 16.05.2025. Po ashtu, KEK dje tha se në njësinë A5 të TC Kosova A, më 17.06.2025 është vërejtur humbje e ujit në kaldajë.

“Ekipet teknike kanë monitoruar nga afër situatën dhe e kanë mbajtur njësinë në funksion deri më 18.06.2025 në ora 00:02, kur ajo është ndalur me qëllim të evitimit të ndonjë avarie të përmasave më të mëdha”, u tha në njoftim.

KEK u zotua për informim me transparencë për çdo zhvillim që ndikon në operimin e njësive dhe furnizimin me energji.