Kastrati: Vuçiqit s’i konvenojnë në pushtet gjigantët e UÇK’së, por eurokremat si Kurti e Taravarat

Deputeti i PDK’së në Kuvendin e Kosovës, Ardian Kastrati, ka reaguar pas deklaratave të Afrim Gashit, kryetarit të Alternativës në Maqedoninë e Veriut.

Kastrati, me anë të një postimi në ‘Facebook’, ka fajësuar kryeministrin e Kosovës, Albin Kurtin, për siç e quan ai “instalim të gjuhës helmuese” mes shqiptarëve.

“VUÇIÇIT NUK I KONVENOJNË NË PUSHTET GJIGANTËT E UÇK-së si HASHIM THAÇI APO ALI AHMETI. ATIJ I KONVENOJNË EUROKREMAT SI KURTI E TARAVARAT. DIHET PSE!”, ka shkruar ai.

“…Sepse Ali Ahmeti e Hashim Thaçi i dolën Vuçiçit përballë me UÇK duke e përzënë nga Kosova e Maqedonia me ndihmën e aleatëve perendimorë. Duke e bërë Kosovën shtet e shqiptarët të barabartë në Maqedoni”, vijon postimi i tij.

Afrim Gashi, kryetar i Alternativës, pjesë e opozitës shqiptare që po përkrahet nga Vetëvendosja, ka barazvlerësuar Ali Ahmetin me presidentin e Serbisë, Aleksandër Vuçiq, ndërsa ka prezantuar aleancën shqiptare dhe Kurtin si heronj. Për këtë ka reaguar edhe BDI-ja.

Gashi, me anë të një postimi në ‘Facebook’ mbrëmë ka marrë për shkas një deklaratë të Vuçiqit, i cili ka citohet të ketë thënë se Kurti po dëshiron të sundojë edhe në Maqedoninë e Veriut, shkruan Gazeta Insajderi.

Ai ka thënë se pas kësaj deklarate është bërë e qartë beteja politike. Ali Ahmetin e BDI’së e ka radhitur me Vuçiqin, ndërkaq opozitën shqiptare me kryeministrin e Kosovës, Albin Kurti.

“Prej sonte beteja jonë politike është bërë edhe më e qartë. Pyetja e zgjedhjeve të 8 majit do të jetë: “A jeni me Vuçiqin e Serbisë e Ali Ahmetin apo jeni me opozitën e bashkuar shqiptare – Lidhja Europiane për Ndryshim dhe Albin Kurtin?”. Më pastër se kaq nuk mund të bëhej. Njësoj edhe më lehtë për të vendosur”, ka shkruar ai.

Për këtë ka ngjallur edhe reagimin e BDI’së. Anëtari i kësaj partie, Arbër Ademi, ka mbrojtur kryetarin e partisë së tij. Ai ka thënë se Ahmeti e ka mposhtur Vuçiqin në luftë.

“Vuçiqin, ithtarin e Millosheviqit, Ali Ahmeti e ka fituar në luftë bashkë me Hashimin, Ramushin, Kadrinë, Rexhepin, Adem e Hamzë Jasharin, Fehmi e Xhevë Lladrovcin. Frontin e forcave pro europiane nuk e ndal asnjë lidhje maqedono-serbo-ruse në ndihmë të derivateve të BDI-së!”.