Kastrati: Dita kur Hashim Thaçi ka me u kthy në Kosovë është shumë afër

Deputeti i Partisë Demokratike të Kosovës, Ardian Kastrati përmes një video ka komentuar aktakuzën e fundit ndaj ish-presidentit Hashim Thaçi nga Gjykata Speciale, shkruan GazetaDemos.

Kastrati u shpreh se në momentin kur Thaçi ka ngritur dorën në Gjykatë, gjyqtarët ‘janë dridhë’, pasi sipas tij ai ka pasur gjithmonë të drejtë.

“Momenti kur e ka çu dorën presidenti ynë i madh atë ditë, ata gjyqtarë janë dridh, janë dridh sepse ata janë të vetëdijshëm që sa herë që e ka çu dorën Hashim Thaçi në histori, gjithmonë ka pas të drejtë , sa herë e kanë çu dorën, pushkën e zanin e kanë ngritë ushtarët e UÇK-së e krejt komandantat e UÇK-së, ata kanë pasë të drejtë”, tha ai.

Deputeti i PDK-së, thotë se ushtarët e Serbisë nuk mundën ta mposhtnin idenë e UÇK-së për çlirimin e vendit.

“Përmbi 250.000 mijë ushtarë, miq të Serbisë, s’kanë mujt me e mposhtë Hashim Thaçin, s’kanë mujt me e mposhtë idenë e UÇK-së për çlirim të këtij vendi, as kjo gjykatë e turpit nuk ka me mujt, kjo gjykatë e cila përveç tjerash funksionon me dosje të Serbisë dhe të bashkëpuntorëve të Serbisë në Kosovë”, tha ai.

Tutje, Kastrati u shpreh se së shpejti Thaçi do të kthehet në Kosovë.

“Dita kur Hashim Thaçi ka me u kthy në Kosovë është shumë afër, aq afër ka tregu aktakuza e djeshme, ata i ka kap panika sepse e kanë pa që lufta ka qenë e drejtë e pastër dhe s’kane fakte.Të gjithë ata që iu kanë gëzu këtij fakti për aktakuzën më të re duhet të dëshpërohen sepse shumë është afër dita kur ky do të triumfoj dhe me këta ka me triumfu edhe e drejta dhe ka me u kthy edhe lavdia e këtij kombi”, tha Kastrati.

Video e plotë: