Kapen mbi 90 kilogramë drogë në Tuz, dyshohet se u transportua nga Shqipëria

Rreth 95 kilogramë marihuanë është sekuestruar nga policia malazeze në rajonin e Tuzit, ndërsa është arrestuar një 20-vjeçar me inicialet M.U.

Operacioni për zbulimin dhe konfiskimin e lëndës narkotike është nisur dhe kryer nga Policia Kufitare e Podgoricës, pas disa ditësh aktivitete nën juridiksionin e tyre në rajonin Nabom – Traboin, në Tuz, raporton A2CNN.

Policia ka kontrolluar automjetin që drejtohej nga i riu duke gjetur në bagazhin e tij katër pako të mëdha me marihuanë, me peshë totale rreth 95 kilogramë.

Autoritetet malazeze kanë dyshime se lënda narkotike ka hyrë nga kufiri i gjelbër me Shqipërinë, ndaj po ndërmerren masa dhe veprime të mëtejshme hetimore për zbulimin e identitetit dhe arrestimin e një personi që dyshohet se ka transferuar drogën nga territori i Shqipërisë, para se t’i dorëzohej të arrestuarit nga Tuzi.

Sakaq i arrestuari është dërguar në paraburgim dhe akuzohet për veprën penale të prodhimit, posedimit dhe shpërndarjes së paautorizuar të lëndëve narkotike.