Kanosje në Skënderaj pas një mosmarrëveshje për prona, Policia gjen kallash e armë tjera tek të përfshirët

Policia e Kosovës ka sekuestruar katër armë në Skënderaj, pas një informate që ka pranuar për një rast kanosje pas një mosmarrëveshje pronësore të mëhershme mes dy personave dhe se njëri prej tyre dyshohet se posedonte armë.

Armët e konfiskuara janë një kalash me dy karikator dhe 60 fishekë, një pushkë gjuetie dy-tytshe me 18 fishekë, një pushkë ajrore dhe armë me gaz e llojit pistoletë.

“Poashtu njësia e hetimeve kanë arritur të sigurojnë një video-incizim në të cilin ishte parë  duke shtënë me armë personi tjetër i përfshirë në mosmarrëveshje”, thuhet në njoftim.

Personat e dyshuar janë intervistuar dhe ndaj tyre janë iniciuar rastet për veprat penale: Kanosje, Armëmbajtje pa leje dhe Përdorim i armës apo mjetit të rrezikshëm.

“Me Aktvendim të prokurorit ndaj të dyshuarve është caktuar masa e ndalimit policor prej 48 orësh”, thuhet në njoftimin e Policisë.