Jo veç në kategorinë e saj, Distria e para në botë

Distria Krasniqi, e ka rrëmbyer vendin e parë në ranglistën botërore të xhudos në kategorinë e femrave.

Kjo pas suksesit të arritur në Kampionatin Botëror, që së fundmi u zhvillua në Budapest, ku ajo e mori medaljen e argjendtë, transmeton Klankosova.tv.

Medalistja e artë e Lojërave Olimpike, tashmë mban totalin më të lartë të pikëve mes të gjitha xhudisteve dhe xhudistëve në glob, transmeton Klankosova.tv.

Publikimi i renditjes u bë sot, dhe për shkak të rezultateve të kampionatit, renditjet kanë pësuar lëvizje të mëdha.

Në renditjen e kaluar, xhudistja kosovare renditej e dyta në peshën –52 kg me 5 mijë e 655 pikë, pas francezes Amandine Buchard, që kishte 5 mijë e 700.

Shtesa prej 1 400 pikësh nga medalja e fundit e ka çuar Krasniqin në kuotën 7 mijë e 55, duke lënë Buchard në vendin e dytë.

Kampionia e re botërore, japonezja Uta Abe, ka kërcyer gjashtë pozicione dhe ndodhet e pesta me 4 mijë e 352 pikë, pasi titulli i artë i solli 2 mijë pikë bonus.

Renditja globale bazohet në rezultatet nga Grand Slamet, Grand Prix-të, Masters-et dhe kampionatet kontinentale, duke qenë thelbësore për normat olimpike dhe përcaktimin e bartësve në garat madhore.

Krasniqi nuk prin vetëm në kategorinë e saj: ajo është numri 1 edhe në renditjen e përgjithshme të femrave. Pas saj renditen francezja Romane Dicko (+78 kg) me 6 650 pikë dhe italiania Alice Bellandi (–78 kg) me 6 595. Madje, Distria ka më shumë pikë se çdo xhudist mashkull: rusi Inal Tasoev (7 000) dhe japonezi Sanshiro Murao (6 895) janë më poshtë në tabelë.

Në Budapest shkëlqeu edhe Laura Fazliu, që me bronzin në –63 kg u ngjit nga vendi i gjashtë në të tretin, ndërsa para saj mbeten kanadezja Catherine Beauchemin-Pinard dhe japonezja Haruka Kaju.

Arritjet e fundit e bëjnë Kosovën krenare: Distria Krasniqi jo vetëm kryeson botën në peshën e saj, por drejton klasifikimin absolut të xhudos, duke i lënë pas emrat më të mëdhenj të këtij sporti