Jep dorëheqje komandanti i policisë në Japoni, mori përgjegjësinë për dështimet në mbrojtjen e Abe

Zyrtarë të lartë të policisë japoneze thanë të enjten se do të japin dorëheqjen pasi një hetim identifikoi gabime sigurie në një ngjarje të fushatës politike muajin e kaluar, ku ish-kryeministri Shinzo Abe u vra nga një person i armatosur që iu afrua nga pas.

Itaru Nakamura, komandanti i Agjencisë Kombëtare të Policisë së Japonisë, mori përgjegjësinë për dështimet dhe njoftoi largimin e tij, duke shënuar një lëvizje të rrallë nga një zyrtar kombëtar i zbatimit të ligjit për të dhënë dorëheqjen pas gabimeve të një agjencie lokale ndërsa kabineti pritet të pranojë dorëheqjen e Nakamura të premten.

Tomoaki Onizuka, shefi i policisë prefekturale në Nara, qyteti afër Osakës ku u vra Abe, gjithashtu njoftoi dorëheqjen e tij, por nuk tha se kur do të ishte efektive. Tre drejtues të tjerë të policisë Nara do të përballen me masa disiplinore, duke përfshirë një ulje page.

Abe u vra më 8 korrik nga një person i cili e kishte përpunuar vetë armën dhe e qëlloi ish-kryeministrin dy herë, një herë në zonën e qafës dhe një herë pranë gjoksit, ku vdiq si pasojë e humbjes së madhe të gjakut pesë orë pasi mbërriti në spital.

Sipas raportit hetimor të Agjencisë Kombëtare të Policisë të lëshuar të enjten, zyrtarët e policisë Nara kishin përgatitur një plan të dobët sigurie përpara ngjarjes dhe nuk arritën të ruanin siç duhet Abe.

Onizuka kishte thënë më parë se policia e Nara ishte informuar për paraqitjen e Abe vetëm një ditë më parë – njoftim më i shkurtër se zakonisht për një ngjarje fushate. Onizuka kishte miratuar planin e sigurisë ditën e ngjarjes dhe nuk kishte asnjë shqetësim për të në atë kohë.

Hetimi konstatoi probleme me planin që kishte miratuar Onizuka dhe me sigurinë në terren ditën e të shtënave. U zbulua se një anëtar i ekipit të sigurisë, i ngarkuar për të ruajtur Abe nga pas, u zhvendos në minutën e fundit në një pozicion tjetër.