Jasharaj: Shkumësit dhe shpuzës i ka kaluar koha, mësimdhënësve duhet t’u rriten pagat

Kryetari i SBASHK-ut, Rrahman Jasharaj ka thënë që pret formimin e qeverisë së re në mënyrë që të ulen e të dialogojnë sa iu përket përmisimit të kushteve të mësimdhënësve.

“Pa u kriju institucionet që kanë dalë nga vota e 9 shkurtit ne s’kemi se as me këtë të komunikojmë. Plani ynë është që të presim në mënyrë që institucionet t’i kuptojnë hallet tona. Dëshira jonë është që përmes dialogut të plotësohen kërkesat e punëtorëve të arsimit. Me formimin e qeverisë së re shpresojë e urojë që t’ia vënë më shumë veshin sektorit të arsimit sepse mund të shtohen zërat dhe mund të ketë veprime sindikale”, ka thënë Jasharaj.

“Shkumësit e shpuzës i ka kaluar koha, andaj tash është mundësia që edhe mësimdhënësve t’iu krijohen mundësitë që të jenë më të motivuar. Institucionet tona t’i shikojnë shtetet përreth dhe në këtë pikë atyre t’iu bëhen kontratat. Të kemi ngritje dukshëm të pagave të vlerës së koeficientit e jo herë 50 në këtë muaj e 50 në tjetrin. Mësimdhënësit duhet të kenë paga më të mira për tu motivuar”, shtoi tutje Jasharaj për Indeksonline.

I pari i SBASHK-ut ka thënë se me qeverinë Kurti nuk është se kanë kaluar periudhë të mirë, përkundrazi siç thotë ai e shohin si një përvojë të vështirë andaj uron që qeveria e ardhshme të ketë qasje më ndryshe dhe modeste.

“Neve na mbetet të shohim se kush do ta formojë qëverinë, ngase kërkesat janë legjitime dhe modeste. Të kemi një marrëveshje për të gjithë, kolektive për secilin sector. Në shkollat tona dukshëm ka mungesë të kushteve dhe në këtë drejtim duhet të punohet”, vlerësoi Jasharaj.