Jahja Koka tha se s’po i japin hapësire në kuvend, Behgjet Pacolli i del në mbrojtje

Deputeti i Vetëvendosjes, Jahja Kokaj është ankuar se s’po i japin hapësirë të mjaftueshme për t’i shprehur mendimet e tij shkencore në Kuvend.

Kokaj tha në Frontal të T7 se kryetarja e grupit parlamentar, Mimoza Kusari ndonjëherë i kërkon që të mos flasë.

“Këto mendime po kam dëshirë t’i jap, por është e vështirë ti të afrohesh te foltorja e parlamentit. Është vështirë se s’ta jep ty fjalën. Glauku ka respekt shumë të madh për mua. Por dikush, ta zëmë, deputeti i një partie çohet pesë herë në ditë flet. E unë e bëj aty… se është një procedurë… Ne jemi 58. Duhet t’i lajmërohesh kryetares së grupit parlamentar. Ajo kryetarja është gjakovare, ka respekt ndaj meje, thotë: profë, ta kalojmë edhe sot, mos fol, a di. Edhe sot ta kalojmë, mos fol, për arsye se s’je në rend dite ti me folë. Ama mua më vëlon sespe e di që janë kah flasin kot”, tha ai.

Deputeti Kokaj përmendi një shembull, kur tha se për 7 orë debat, deputetët s’ia kishin qëlluar fare dhe se ai më pas i kishte kërkuar kryeparlamentarit Glauk Konjufca që t’ia jepte fjalën.

“Për shembull folshin për energjinë. S’ia qëllojshin fare, fare, fare, fare, 7 orë e gjysmë. Më plasi, i thashë ‘Glauk, ama’. Tha pa rend ta jap, se s’është rendi”, tha Kokaj.

Në mbrojtje i ka dalë kryetari i AKR-së, Behgjet Pacolli i cili i ka komentuar në një postim tjetër se nuk duhet të i ndalet fjala asesi.

“O prof, e lexova qe ka tendenca me ta ndaluar fjalën ne kuvend!

Nuk është mire kjo… ashtu si te njoh nuk është logjike të të ndalohet fjala ty. Unë e di sa shume ti ke me thënë nga ajo qe ende nuk e ke thënë. Unë për shembull te kam dëgjuar gjithmonë me shume pasion se ndeja me ty është një mësim me tepër. Rrofsh sa malet prof”, ka shkruar Pacolli.