Izraeli dhe SHBA-të largohen nga bisedimet për armëpushim në Gaza

Negociatorët izraelitë dhe amerikanë kanë vendosur të largohen nga bisedimet për armëpushim në Gaza në kryeqytetin e Katarit, Doha, me Uashingtonin që akuzon Hamasin se nuk “vepron me mirëbesim”.

Në një deklaratë, i dërguari special i SHBA-së, Steve Witkoff, tha: “Ne kemi vendosur ta sjellim ekipin tonë në shtëpi nga Doha për konsultime pas përgjigjes së fundit nga Hamasi, e cila tregon qartë mungesën e dëshirës për të arritur një armëpushim në Gaza”.

Qeveria izraelite nuk tha se çfarë e shkaktoi tërheqjen e saj, por një zyrtar i lartë izraelit u citua në mediat lokale të thoshte se nuk kishte “kolaps” në negociata.

Hamasi nuk ka komentuar për këtë çështje, por të gjitha palët e përfshira në bisedime – përfshirë ndërmjetësit – pranojnë se mbeten boshllëqe të mëdha në çështjet kryesore.

Në deklaratën e së enjtes, Witkoff tha se “ndërsa ndërmjetësit kanë bërë një përpjekje të madhe, Hamasi nuk duket se është i koordinuar ose nuk vepron me mirëbesim”.

“Tani do të shqyrtojmë mundësi alternative për të sjellë pengjet në shtëpi dhe do të përpiqemi të krijojmë një mjedis më të qëndrueshëm për popullin e Gazës”.

“Është për të ardhur keq që Hamasi ka vepruar në këtë mënyrë egoiste. Ne jemi të vendosur në kërkimin e një fundi të këtij konflikti dhe një paqeje të përhershme në Gaza”.

Raundi i fundit i bisedimeve në Doha – me ndërmjetësuesit e Katarit dhe Egjiptit – ka vazhduar për më shumë se dy javë.