“Ishte i lidhur me një grua e cila më pas u lidh me Albanin’, dalin detaje nga letra e Gashit drejtuar Policisë për vrasjen në Prishtinë

Një ngjarje tragjike e ndodhur më 25 mars në rrugën “Rrustem Hyseni” në lagjen e njohur si “4 Llullat” në Prishtinë tronditi të gjithë vendin, ku pas të shtënave me armë zjarri drejt një lokali nga dy persona të armatosur e të maskuar, vdiq Naser Gashi dhe u plagos Miftar Miftari, raporton GazetaDemos.

I dyshuari kryesor për vrasjen e Naser Gashit është Alban Gashi, i cili akoma ndodhet në arrati.

Gjatë ditës së djeshme nga një raportim i “Betimit për Drejtësi”, u bë e ditur se i dyshuari i lartëcekur përmes avokatit të tij, Fanol Krasniqi, i ka dërguar një letër Policisë duke dhënë versionin e tij për krimin.

Aty thuhet se problemi mes Gashit e Miftarin i nisur në Spanjë, filloi kur Miftari kishte qenë në lidhje me një grua e cila më pas ishte lidhur me një person me emrin Alban (mbiemri i të cilit nuk dihet), por që ai kishte menduar se ishte vetë Gashi.

Sipas kësaj letre, thuhet se Miftari e ka sharë e ofenduar Gashin me anëtarë të familjes- gruan e vajzën e mitur, deri te kërcënimi për babanë e tij. Më pas, thuhet se Miftari i kishte shkuar Gashit edhe tek banesa ku e kishte kanosur me thikë, madje kishte tentuar ta therte.

Alban Gashi po ashtu pretendon se nuk ka shtënë në drejtim të asnjërit nga personat që gjendeshin në lokal, mirëpo gjuajta e tij në drejtim të Miftarit, ka ardhë pasi ai e plagosi, teksa sipas “Betimit për Drejtësi”, Gashi në letër shton se Miftari kishte pasur mosmarrëveshjen me një person tjetër me emrin Alban dhe jo me të personalisht, kështu supozohet se ai e kishte përzier me atë person.