Ish-kryetari i Listës Serbe nuk i përgjigjet thirrjes së Prokurorisë Speciale për intervistim

Prokuroria Speciale e Republikës së Kosovës ka njoftuar se ish-kryetari i Listës Serbe, Goran Rakiq, nuk është paraqitur në seancën e fundit për intervistim, e cila ishte thirrur më 18 qershor 2025.

Sipas zëdhënëses së Prokurorisë Speciale, Arbnora Luta, Rakiq ishte ftuar për intervistim fillimisht, por kishte dorëzuar një raport mjekësor në të cilin thuhej se kishte probleme shëndetësore dhe për këtë arsye nuk mund të merrte pjesë.

Në ftesën e dytë, të dërguar nga Prokuroria Speciale për datën 18 qershor, deputeti i Kuvendit të Serbisë nuk ka paraqitur asnjë arsye për mungesën e tij.

“Lidhur me rastin për të cilin keni kërkuar informacion, ju njoftojmë se z. Goran Rakiq, pas ftesës së parë, ka informuar Prokurorinë Speciale përmes një raporti mjekësor se ka probleme shëndetësore dhe nuk mund të paraqitet për intervistim. Prokuroria Speciale e ka ftuar sërish më 18 qershor, por ai ende nuk ka dhënë arsyetimin për mungesën e tij. Shumë shpejt, Prokuroria Speciale do të caktojë seancën e radhës për intervistim,” ka deklaruar Luta.