Më 20 prill të këtij viti, vdiq ish-komandanti i UÇK-së nga Vushtrria, Gani Imeri. Ish-luftëtari i UÇK-së është kujtuar nga shumë personalitete e qytetarë për vlerat që përfaqësonte.
E gjatë emisionit “Frontal” për të ka folur edhe mbesa e tij, Xhevahire Izmaku. Ish-gazetarja e luftës mes emocioneve ka rrëfyer se i qëndroi afër edhe gjatë kohës sa po luftonte me jetën.
“Vdekja e dajës ( Gani Imeri ) ka qenë një goditje shumë e madhe për ne e për të gjithë qytetarët e Vushtrrisë. Ka qenë një humanist shumë i madh, vdiq për dy ditë pas një sulmi që kishte. E kam vizituar edhe në spital në Tiranë ku po trajtohej. Kam me mungu shumë, më ka kritikuar edhe kur isha deputete. U ka ndihmuar të gjithë atyre që kanë trokitur në derë të tij”, ka rrëfyer Izmaku.
Sipas mbesës së Gani Imerit, është e vështirë të ndërtohet një personalitet i njëjtë me atë të ish-luftëtarit të UÇK-së
“Vështirë është me e ndërtu edhe një herë një Gani Imer. Prezenca e tij ka shujt edhe shumë konflikte e ngatrresa. Ky njeri kurrë nuk është livdu për punën e tij, gjithmonë ka folur për luftën e kaprollat që i ka në Dumnicë”, ka thënë ajo.