Ish-ambasadori Cana: Kjo qeveri do t’ia humbas Kosovës 10 vjet

Edon Cana, ish-ambasadori i Kosovës në Bullgari ka thënë se jemi në një situatë mjaftë serioze, e cila sipas tij do të prodhojë pasoja një dekadëshe për Kosovën.

Cana ka thënë se kjo qeveri do t’ia humbas 10 vite Kosovës. “Këta do t’ia humbasin Kosovës 10 vjet dhe do të kthehemi prapë në pikën zero”, ka thënë ai.

“Kjo si rrjedhojë e pamaturisë, mungesës së vizionit dhe kalkulimit strategjik me aleatët tanë, gjë që nuk ka ndodhur që nga përfundimi i luftës”, ka thënë Cana duke shtjelluar se kemi të bëjmë me një poltikë “të cilën vetëm një njëri e udhëheq”, ka deklaruar ai në RTV Dukagjini.

Cana ka thënë tutje se kryeministri Kurti është ai që po e udhëheq vendin derisa presidentja Osmani nuk po e përfill rolin e vet kushtetues.

“Presidentja ka obligim kushtetues t’a mbrojë në aspektin apolitik pozitën e Republikës së Kosovës”, ka shtuar Cana duke theksuar se presidentja Osmani “është një notere e tij (Kurtit)”.

Ish-ambasadori i Kosovës në Bullgari ka theksuar se Kurti i ka bashkuar të gjithë aleatët euroatlantikë kundër Kosovës. “Në këtë situatë ajo çfarë nuk mund të ëndërronte Vuçiqi ajo i ka ndodhur, një problem poltik është shndërruar në një problem të sigurisë”.