Iran: 22-vjeçarja rrahet për vdekje nga policia, pasi nuk e vuri shaminë siç e kërkon ligji

Një vajzë 22-vjeçare ka vdekur në një spital iranian, disa ditë pasi u ndalua nga policia e regjimit, për dyshimin se nuk respektoi rregullat e vendit për shaminë.

Mahsa Amini po udhëtonte me familjen e saj nga provinca perëndimore e Iranit, Kurdistan, për në kryeqytetin Teheran, për të vizituar të afërmit e saj, kur u raportua se ajo u arrestua për dështimin në përmbushjen e rregullave strikte të vendit për veshjen e grave.

Dëshmitarët raportuan se Mahsa ishte rrahur në furgonin e policisë, një pretendim që policia e mohoi.

Lajmi vjen disa javë pasi presidenti i vijës së ashpër të Iranit, Ebrahim Raisi, urdhëroi respektimin minimal të mundshëm e të drejtave të grave dhe bëri thirrje për zbatim më të rreptë të kodit të veshjes së detyrueshme të vendit, i cili u kërkon të gjitha grave të mbajnë mbulesë të kokës që nga revolucioni islamik i vitit 1979.

Familja e Mahsas u njoftua se ajo ishte dërguar në spital disa orë pas arrestimit.

Sipas Hrana, një organizatë iraniane për të drejtat e njeriut, familjes së Amini iu tha gjatë arrestimit se ajo do të lirohej pas një “sesioni riedukimi”.

Policia më vonë tha se Amini kishte pësuar një sulm në zemër. Megjithatë, familja e Aminit e kundërshtoi këtë dhe tha se ajo ishte e shëndetshme dhe nuk kishte përjetuar ndonjë problem shëndetësor më parë.

Vajza ishte në koma pasi mbërriti në spital, tha familja e saj, duke shtuar se stafi i spitalit u tha se ajo ishte e vdekur në tru, raporton Guardian.

Në rrjetet sociale kanë qarkulluar fotografi të Aminit e shtrirë në shtratin e spitalit në gjendje kome me fasha rreth kokës dhe tuba të frymëmarrjes.

Presidenti Rais nënshkroi një dekret më 15 gusht që shtrëngonte veshjen e grave dhe përcaktonte dënime më të ashpra për shkeljen e kodit të rreptë, si në publik ashtu edhe në internet.

Gratë janë arrestuar në të gjithë vendin pas “ditës kombëtare të hixhabit dhe dëlirësisë”, të shpallur më 12 korrik.