“Informoi BIA-n, përfitoi 700 euro” – Detaje të rreja për të dyshuarin për spiunazh Hysri Selimi: U dërgoi të dhëna për udhëheqës të partive politike

Hysri Selimi, i dyshuar për kryerjen e spiunazhit, këtë të mërkurë Gjykatë Themelore në Prishtinë i ka caktuar masësn e paraburgimit prej 30 ditësh.

Në bazë të kërkesës për cakimin e masës së Paraburgimit nga Prokuroria Speciale, tregohen detaje se si Selimi kishte pranuar para në vlerë prej 700 euro për të dërguar të dhëna tek BIA serbe për udhëheqës të partive politike, struktura të sigurisë së Kosovës, si dhe personave të radikalizuar.

“Prokuroria Speciale dyshon se i pandehuri u ka ndihmuar zyrtarëve të Agjencisë së Intelegjencës së Serbisë ( BIA ), me informata të dhënë përmes takimeve fizike e komunikimeve me disa telefona. Për këto ai ka pranuar shuma të ndryshme të parave, njëra prej të cilave ishte 700 euro. I pandehuri i ka dërguar BIA-s të dhëna mbi udhëheqës të partive politike, struktura të sigurisë së Kosovës, si dhe personave të radikalizuar”, thuhet në kërkesën e Prokurorisë Speciale për caktimin e masës së sigurisë.

Arrestimi i Selimit është rezultat i një hetimi të gjerë dhe të thelluar nga Prokuroria Speciale, që përfshinte edhe masa të veçanta hetimore të zbatuara për disa muaj.

Operacioni është realizuar në bashkëpunim të ngushtë me Policinë e Kosovës, përkatësisht Drejtorinë për Hetimin e Krimit të Organizuar dhe Krimeve të Rënda si dhe me asistencën e Agjencisë së Kosovës për Inteligjencë (AKI).

Gjatë këtij operacioni janë bastisur dy lokacione në territorin e Kosovës, me urdhër të gjykatës kompetente.

Gjatë kontrollit janë sekuestruar prova materiale që lidhen me aktivitetet e dyshuara, përfshirë pajisje të komunikimit elektronik, të cilat mund të jenë përdorur për transmetim të informatave konfidenciale.

Selimi është ndaluar për 48 orë me vendim të prokurorit të rastit, ndërsa hetimet pritet të thellohen për të sqaruar plotësisht rrethanat dhe për të zbuluar ndonjë përfshirje të mundshme të palëve të tjera.

Emri i Hysri Selimit nuk është i panjohur për sistemin e drejtësisë në Kosovë.

Më datë 23.11.2015 me përgatitje paraprake së bashku me familjen kishte lëshuar territorin e Republikës së Kosovës me destinacion Sirinë, për t’iu bashkëngjitur ISIS-it.

Sipas aktakuzës së ngritur në atë kohë nga Prokuroria, Selimi ishte i angazhuar në Byronë e ushtarëve të plagosur të ISIS-it, për çka edhe ishte paguar rregullisht nga kjo organizatë, me shumën e të hollave prej 100 USD në muaj.

Ai u riatdhesua në Kosovë më 28 maj 2022, ku më pas u përball me proces gjyqësor për çka edhe u dënua me burgim në kohëzgjatje prej 4 vite e 8 muaj, në të cilin dënim i llogaritet koha e kaluar në paraburgim nga data 01.08.2018.

“I akuzuari me datë 23.11.2015, me paramendim dhe me dashje si dhe me përgatitje paraprake së bashku me bashkëshorten e tij dhe vajzën e mitur kishte lëshuar territorin e Republikës së Kosovës, përmes Aeroportit Ndërkombëtar “Adem Jashari” në Prishtinë dhe kishte udhëtuar për në qytetin e Stambollit të Republikës së Turqisë dhe përmes lidhjeve të caktuara kishte depërtuar në Siri, me qëllim që ti bashkëngjitet organizatës terroriste “ISIS”, e cila në këto vende ka qenë duke u luftuar, është angazhuar si pjesëtarë i “ISIS-it”, si administrator në Byronë e ushtarëve të plagosur nën administrimin e “ISIS-it”, është financuar nga “ISIS” me shumën e të hollave prej nga 100 Dollar Amerikan në muaj, duke bashkëpunuar edhe me epror dhe luftëtarë të “ISIS-it”, si Lavdrim Muhaxheri etj, e që më pastaj është dorëzuar tek Forcat Demokratike Siriane, ku edhe me datë 28.05.2022 është riatdhesuar në Republikën e Kosovës”, njoftonte Gjykata Themelore në Prishtinë në dhjetor të vitit 2022.

Tashmë, vetëm pak vite pas kthimit të tij nga zonat e konfliktit, Hysri Selimi përballet me akuza të reja dhe të rënda, këtë herë për spiunazh.