Incidenti në Aeroportin e Shkupit me presidenten Osmani, VLEN i jep mbështetje kryekuvendarit Afrim Gashi

Koalicioni i partive shqiptare në Maqedoni të Veriut, VLEN, ka vlerësuar interperlancën ndaj kryekuvendarit Afrim Gashi lidhur me incidentin në Aeroportin e Shkupit me presidenten e Kosovës, Vjosa Osmani, si një eksperiment politik të pakuptimtë dhe përpjekje për destabilizim.

Më 1 gusht kishte ardhur te një incident ku ishte përfshirë sigurimi që shoqëronte presidenten e Kosovës, Vjosa Osmani dhe stafit të sigurimit të aeroportit. Më pas në aeroport kishte shkuar sigurimi i Gashit, e kryekuvendari i Maqedonisë së Veriut tha se stafi i tij kishte shkuar për ta qetësuar situatën.

“Unë personalisht dhe sigurimi i Kuvendit, në aeroport kemi shmangur një incident i cili mund të kishte më shumë pasoja. Unë jam i kënaqur që gjithçka përfundoi si duhej. Ata persona që i kanë tejkaluar autorizimet e tyre, do të veprojë Ministria e Brendshme ashtu siç e parashikon ligji. Të ju them se gjithmonë kur të duhet të qetësohet situata unë do të veproj dhe gjithmonë do të jem këtu për të mirën e qytetarëve, të mos ketë konflikte, incidente dhe pasoja më të rënda”, deklaroi Gashi.

Më 3 shtator do të mbahet interpelancë në Kuvendin e Maqedonisë së Veriut lidhur me incidentin.

“Trupi Koordinues i VLEN-it e vlerëson interpelancën ndaj kryetarit të Kuvendit si një eksperiment politik të pakuptimtë dhe një përpjekje për destabilizim. Ne shprehim mbështetje të parezervë dhe unanime për kryetarin Afrim Gashi, duke theksuar se kjo interpelancë është një sulm i drejtpërdrejtë ndaj institucioneve shtetërore dhe integrimit euro-atlantik të vendit. Kjo është një iniciativë e parashtruar nga partia anti-NATO, ‘LEVICA’, me mbështetje të hapur nga LSDM dhe të fshehur nga BDI, të cilat në fakt po testojnë një koalicion opozitar të zgjeruar në dëm të interesave strategjike”, u tha nga VLEN.

VLEN po ashtu ka komentuar çështjen e Ligjit për Përdorimin e Gjuhëve që do të trajtohet nga Gjykata Kushtetuese e Maqedonisë së Veriut në tetor. VLEN ka bërë thirrje të mos hapet “Kutia e Pandorës”.

“Trupi Koordinues i VLEN-it, pa dashur të ndërhyjë në punët e Gjykatës Kushtetuese, e vlerëson si të rrezikshme dhe të papranueshme nismën e tyre për të vlerësuar kushtetutshmërinë e Ligjit për Përdorimin e Gjuhëve. Ne vlerësojmë se kjo iniciativë, e cila buron nga forca të njohura për qëndrimet e tyre kundër NATO-s, nuk është asgjë më shumë se një përpjekje për grusht shteti me eksperimente juridike. Nëse një iniciativë e tillë pranohet, hapet ‘Kutia e Pandorës’ për të gjitha arritjet kyçe të shtetit, duke përfshirë edhe ndryshimin e emrit kushtetues, i cili gjithashtu u realizua pa nënshkrimin e presidentit të atëhershëm, Gjorge Ivanov, e që mundësoi anëtarësimin në NATO. Një akt i tillë do të minonte stabilitetin dhe sovranitetin e Republikës së Maqedonisë së Veriut, duke kërcënuar seriozisht orientimin e saj euro-atlantik. Koalicioni VLEN do të mbrojë me vendosmëri dhe pa kompromis integritetin e institucioneve të shtetit dhe interesat e qytetarëve të Maqedonisë së Veriut, duke qëndruar fuqishëm kundër çdo përpjekjeje për të dëmtuar rrugën euro-atlantike të vendit”, thuhet nga VLEN.