IKShPK me organizim në Pejë për shënimin e Ditës Botërore të Diabetit

Me moton: “Mësoje rrezikun tënd, gjeje zgjidhjen”, organizuar nga Instituti Kombëtar i Shëndetësisë Publike në bashkëpunim me Projektin SDC /AQH-IHS, në Pejë u shënua Dita Botërore e Diabetit 2023.

Drejtori ekzekutiv i IKSHPK-së, Prof. Naser Ramadani tha se në vitin 2023, fushata fokusohet në rëndësinë e njohjes së rrezikut të diabetit për të ndihmuar në parandalimin e komplikimeve të lidhura me diabetin dhe rëndësinë e të pasurit qasje në informim dhe kujdes të duhur, për të siguruar trajtimin në kohë dhe menaxhimin e sëmundjes.

“Kjo thekson rëndësinë e të pasurit qasje të barabartë në informacionin e duhur dhe kujdesin themelor për të siguruar trajtimin dhe menaxhimin në kohë. Në Kosovë, në vitin 2022 janë raportuar 2455 raste të reja të Diabetit Tip 1 pra të varur nga Insulina dhe 7302 raste të reja të Diabetit Tip 2, të pavarur nga Insulina”, theksoi Prof. Ramadani.

Prof. Merita Berisha, drejtoreshë e Departamentit të Mjekësisë Sociale në IKSHPK, theksoi se nëse bëhet preventivë e mirë ndaj katër faktorëve kryesorë të rrezikut si: Duhanpirja, Alkooli, kequshqyeshmëria dhe inaktiviteti fizik, do të mund të kontrollohen katër sëmundjet e mëdha jo-ngjitëse, ku hyn edhe diabeti, si dhe të parandalohen gjysma e vdekjeve që vijnë nga sëmundjet jo-ngjitëse.

Dr. Fabian Cenko, nga projekti SDC/AQH-IHS, tha se në ditët e sotme sistemet shëndetësore nuk kanë nevojë për plane të mëdha apo komplekse për të luftuar diabetin, por për ndërhyrje të thjeshta dhe të qëndrueshme. “Për të mundur diabetin sot duhet të fillojmë të fuqizojmë njerëzit nëpërmjet edukimit të tyre se si të përdoren njohuritë për të zbatuar praktikat më të mira të bazuara në evidencë. Pjesa tjetër e rezultateve vjen nga ata vetë”, theksoi Cenko.

Z. Idriz Hetemi nga Shoqata e Diabetikëve, tha se duke bashkëpunuar janë arritur rezultate të mira si në edukimin e pacientëve, ashtu edhe në menaxhimin e rasteve të prekura me diabet.

Dr. Adnora Nurboja, drejtoreshë e QRSHP në Pejë, tha se këtë vit eventi është regjistruar ne faqen zyrtare të Federatës Botërore të Diabetit dhe “na është lejuar përdorimi i materialeve edukativo shëndetësore dhe vetëdijësuese nga kjo faqe, dhe na është ofruar logoja e përkthyer në gjuhën shqipe”.

Në këtë takim kanë marrë pjesë edhe përfaqësues nga spitali i Përgjithshëm në Pejë, QKMF, përfaqësues nga KFOR-i, etj.