I plagosuri me armë zjarri sot në Prishtinë në gjendje stabile, po trajtohet në QKUK

Në lagjen “Kodra e Trimave” në Prishtinë mëngjesin e sotëm ka pasur të shtëna me armë zjarri ku si pasojë një person është plagosur.

Drejtori i Emergjencës në QKUK, Naser Syla ka dhënë detaje për gjendjen e të plagosurit.

Ai ka thënë se gjendja e tij është stabile.

“Pacienti është në Klinikën e Emergjencës duke u trajtuar, gjendja stabile është, ende është duke u observuar në Klinikën e Emergjencës, janë kryer ekzaminimet e duhura pritet të intervenohet në sallën operative nga ekipet kujdestare të anestezionit dhe ortopedisë, trajtimi do të vazhdojë në Klinikën e Ortopedisë”, ka thënë Syla.

Policia e Kosovës bëri të ditur se ngjarja ka ndodhur sot rreth orës 07:00 të mëngjesit.

“Sot rreth orës 07:00 policia ka marrë informatën për një plagosje me armë zjarri të ndodhur në lagjen Kodra e Trimave në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen ku dyshohet se nga një person është plagosur me armë zjarri dhe i njëjti është dërguar për tretman mjekësor.

“Aktualisht hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit”, tha zëdhënësja e policisë, Flora Ahmeti.