I dyshuari si anëtar i partisë së gruas së Millosheviqit, largon nga puna veteranin që kritikoi Pacollin

Pushteti i Vetëvendosjes me Albin Kurtin i është hakmarrë veteranit të UÇK-së,  Agim Pllashniku pas protestave dhe kritikave që pati kundër deputetes së VV-së, Fitore Pacolli.

Hakmarrjen, Vetëvendosje e ka kryer nëpërmjet Faruk Mujkës, i afërt i Albin Kurtit dhe kryeshef i ndërmarrjes “Ibër-Lepenci”.

Mujka ka një të kaluar të errët dhe lidhje të forta me regjimin e kasapit të Ballkanit, Sllobodan Millosheviq, pasi dyshohet se ka qenë anëtar i partisë së bashkëshortes së tij, Mira Markoviq.

Me të ardhur në pushtet Vetëvendosje, ishte publikuar dokumenti me vulë dhe nënshkrim që faktonte se Mujka ishte anëtar i partisë JUL.

Mujka këtë të enjte më 31 korrik, ka nënshkruar vendimin për largimin e menjëhershëm nga puna të Agim Pllashnikut.

Në vendimin që e ka siguruar Paparaci thuhej se Pllashnikut i shkëputet kontrata me efekt të menjëhershëm nga data e nënshkrimit të vendimit.

“Të njëjtit i ndalohet qasja në objektet e NJ.P. Shkabaj dhe në të gjitha objektet e tjera të ndërmarrjes “Ibër Lepenc”, thuhej në pikat e vendimit.

Përfaqësuesi ligjor i Pllashnikut, avokati Gent Gjini në një përgjigje për Paparacin ka thënë se shkëputja e kontratës është bërë pas kallëzimeve penale që klienti i tij i ka bërë ndaj Fitore Pacollit për sulm fizik dhe për deklarim të rrejshëm kur deputetja ka deklaruar se Pllashniku ka pasur armë në çantë në ditën kur ai protestoi para saj në një restorant në Prishtinë.

“Arsyet se ai është larguar për sjellje të këqija janë vetëm shkas ose arsye”, ka thënë avokati Gjini./Paparaci