I dërguari i Trumpit: Lufta e Gazës duhet të zgjidhet deri në fund të vitit

I dërguari special i SHBA-së, Steve Witkoff, ka thënë të martën se presidenti Donald Trump do të kryesojë një takim mbi situatën në Gazë në Shtëpinë e Bardhë të mërkurën, duke shtuar se Uashingtoni pret që konflikti i Izraelit në territorin palestinez të zgjidhet deri në fund të vitit.

“Ne mendojmë se do ta zgjidhim këtë në një mënyrë ose në një tjetër, sigurisht para fundit të këtij viti.”, ka thënë Witkoff.

Sipas Departamentit të Shtetit të SHBA-së, sekretari i Shtetit, Marco Rubio, do të takohet gjithashtu me ministrin e Jashtëm izraelit, Gideon Saar, në Uashington të mërkurën.

Trumpi kishte premtuar një fund të shpejtë të luftës në Gazë gjatë fushatës zgjedhore të vitit 2024 dhe pas marrjes së detyrës në janar, por pothuajse shtatë muaj pas fillimit të mandatit, ky qëllim i deklaruar mbetet i pakapshëm.

Mandati i tij ka filluar me një armëpushim që zgjati dy muaj, por përfundoi më 18 mars kur sulmet izraelite vranë rreth 400 palestinezë. Në javët e fundit, imazhet e palestinezëve të uritur në Gaza, përfshirë fëmijë, kanë tronditur botën dhe kanë nxitur kritika ndaj Izraelit për përkeqësimin e kushteve.

Witkoff ka theksuar se Izraeli është i hapur për të vazhduar diskutimet me grupin militant palestinez Hamas. Ai ka shtuar se edhe Hamasi kishte sinjalizuar se ishte i hapur për një zgjidhje.