Humbi në plazhin e Shëngjinit, Policia e gjen 9 vjeçaren nga Kosova shëndoshë e mirë

Policia e Shtetit ka bërë të ditur se e ka gjetur një vajzë të mitur nga Kosova, e cila ishte larguar nga prindërit e saj, derisa ishin duke pushuar në plazhin e Shëngjinit.

Në njoftimin e lëshuar për media thuhet se 9 vjeçaren zyrtarët policorë shqiptarë e gjetën në gjendje të mirë shëndetësore, dhe ua dorëzuan prindërve të tij.

“Salla Operative e DVP Lezhë u njoftua nga një familje pushuesish nga Kosova, se vajza e tyre e mitur ishte larguar dhe nuk po e gjenin dot. Menjëherë pas marrjes së njoftimit, shërbimet e Policisë që patrullojnë me biçikleta në zonën e plazhit në Shëngjin u angazhuan në kërkime intensive në terren”, thuhet në njoftimin e policisë.

Prindërit e vajzës kanë falënderuar shërbimet e Policisë për reagimin e shpejtë dhe profesional që bëri të mundur gjetjen e të miturës.

Policia e Shtetit u bën apel pushuesve që të tregojnë kujdes për fëmijët.