Hoxhaj në Tiranë: Diaspora shqiptare është zgjerimi ynë natyral në Evropë dhe botë

Në kuadër të WO-MEN Power Summit, që u mbajt në Tiranë, Enver Hoxhaj ishte pjesë e panelit diskutues ku trajtoi rolin e diasporës shqiptare në shoqërinë e sotme. 

Në fjalën e tij, Hoxhaj theksoi rëndësinë e fuqizimit të rrjeteve të shqiptarëve në Ballkan dhe Perëndim, duke nënvizuar se rrjetëzimi është çelësi për sukses personal, profesional dhe kolektiv.

Duke iu referuar studimeve të Universitetit të Harvardit, ai theksoi se ndërlidhjet njerëzore janë më të rëndësishme sesa pasuria, fama apo pozitat politike. 

“Në Ballkan jetojnë rreth 7 milionë shqiptarë, ndërsa në Perëndim rreth 2 milionë të tjerë. Kemi një Shqipëri dhe një Kosovë në Ballkan, dhe një tjetër në Perëndim,” tha Hoxhaj, duke ftuar për një perceptim të ri të diasporës si zgjerim natyral të identitetit shqiptar në gjeografinë globale.

“Përfitimet e rrjetëzimit për shqiptarët në Ballkan dhe në Perëndim përfshijnë akses në mundësi punësimi, lidhje profesionale, këshilla për karrierë, ide të reja dhe informacione të vlefshme. Rrjetëzimi i shqiptarëve ndihmon gjithashtu në rritjen personale dhe të biznesit, në ndërtimin e marrëdhënieve dhe në fitimin e një avantazhi konkurrues në ekonomitë e Ballkanit, të Evropës dhe kudo në botë!”, ka thënë Hoxhaj. 

Ai vlerësoi rolin që tashmë luajnë bizneset, akademikët, sportistët dhe artistët shqiptarë jashtë vendit dhe theksoi se është koha që shqiptarët të jenë të pranishëm edhe në politikën ndërkombëtare. “Nëse të tjerët – grekët, kroatët, serbët dhe boshnjakët – e bëjnë, pse të mos e bëjnë edhe shqiptarët?”, përfundoi Hoxhaj.

“Shqiptarët që jetojnë në Perëndim duhet ta shohin veten jo si diasporë apo mërgatë, por si zgjerim i Shqipërisë dhe Kosovës në një gjeografi evropiane dhe globale! Kudo sot shkëlqejnë bizneset shqiptare; të rinjtë shqiptarë janë akademikë, sportistë dhe artistë të njohur, duke u bërë ikona për shoqëritë perëndimore. Por është koha që ata të hyjnë kudo edhe në politikën perëndimore, duke u bërë pjesë e Kongresit Amerikan, Parlamentit Britanik, Bundestagut Gjerman dhe institucioneve të tjera! Nëse të tjerët – grekët, kroatët, serbët dhe boshnjakët – e bëjnë, pse të mos e bëjnë edhe shqiptarët?”, ka thënë tutje Hoxhaj në Samit.

Samiti, i cili bashkoi personalitete nga fusha të ndryshme, vuri në qendër fuqizimin ekonomik dhe shoqëror të gruas dhe rolin e diasporës në ndërtimin e urave të reja të bashkëpunimit dhe zhvillimit