Hoxha: Qasja favorizuese e Perëndimit ka inkurajuar sjelljen agresive të Serbisë

Ish-kryediplomati i Kosovës, Enver Hoxha, ka njoftuar për pjesëmarrjen e tij në një panel të organizuar nga Instituti Octopus në konferencën “Ndikimi i agresionit rus në Ukrainë, në gjeopolitikën evropiane”.

Duke përmendur krizat në rritje në Gaza, Ukrainë dhe sulmin e fundit të Iranit kundër Izraelit, Hoxha theksoi paparashikueshmërinë e këtyre kohërave. Ai theksoi ndër të tjera se lufta në Ukrainë gjithashtu ka rindezur “ambicjet hegjemoniste”.

Hoxha ka kritikuar më tej qasjen e Perëndimit ndaj shtetit serb. Ai argumentoi se kjo qasje ka trimëruar agresionin e Serbisë.

“Qasja e Perëndimit, shpesh duke favorizuar zbutjen e Serbisë, nuk arrin të përballet me këto veprime destabilizuese. Kjo politikë inkurajon sjelljen agresive të Serbisë duke minuar sovranitetin e fituar me vështirësi të Kosovës, por edhe atë të Malit të Zi dhe të Bosnjes! Perëndimi ka ndërtuar një rend evropian në Ballkan me hartën e shteteve të pavaruara, ku Mali i Zi në 2006 dhe Kosova në 2008 ishin të fundit, duke ndjekuar një politikë të parimeve dhe të vijave të kuqe! Ku janë sot vijat e kuqe të perëndimit për Serbinë?” – tha ai.