Hoxha për kërkesat e ndërkombëtarëve: Janë në favor të Kosovës

Kërkesat e ndërkombëtarëve sa i përket çështjes së veriut, sipas Yll Hoxhës, nuk shkojnë në disfavor të Kosovës. Ai në “Debat Plus”, tha se tri kërkesat e tyre, siç janë mbajtja e zgjedhjeve komunale në veri, pjesëmarrja e serbëve në zgjedhje dhe shpejtimi i zbatimit të marrëveshjes, janë të gjitha në favor të Kosovës.

Hoxha tha se veprimet e Qeverisë së Kosovës, në veri janë bërë për ta rikthyer vëmendjen te zbatimi i marrëveshjes së Ohrit.

“Kërkesat që kanë dalë nga BE dhe ndërmjetësuesit, nuk janë në disfavor të Kosovës, deeskalimi i situatës në veri, mbajtja e zgjedhjeve në veri me pjesëmarrje të serbëve, zbatimi i marrëveshjes, të trijat janë në interes të Kosovës. Hipoteza ime pa informata, pse kam konsideru pse kryeministri ka pasur nevojë ta nxisë një problem në mënyrë që me rikthy vëmendjen te zbatimi i saj, kam konsideru që është pengesa që Serbia ka bërë në zbatimin e marrëveshjes”, ka thënë ai.

Hoxha, theksoi se marrëveshja e Ohrit, duhet të zbatohet në tërësi dhe se Asociacioni duhet të formohet sipas kushteve të marrëveshjes.

Ai tha se Serbia duhet të dënohet për shkeljen e marrëveshjes dhe se një gjë e tillë më nuk duhet të tolerohet.

“Ajo duhet të zbatohet në tërësi, nuk ka nen që e mbizotëron dytin apo tretin. Asociacioni duhet të bëhet si pjesë implementimi të përgjithshëm të kushteve të marrëveshjes. Shkelja që e bën Seria në KiE, në zgjedhje, nuk duhet të tolerohen. Obligimi për Asociacionin duhet të merret seriozisht. Nëse kemi mbërri që deri në fund të kësaj jave, të kemi një bashkësi ndërkombëtare që e shikon këtë situatë në mënyrë agresive, dhe na kërcënon me ultimatum të dy palët, mendoj që është arritur progresi dhe duhet Qeveria të kthehet prapa”, ka thënë ai.