Haxhiu për Isufajn: Nuk ka vullnet për t’i luftuar “peshqit e mëdhenj”

Ministrja e Drejtësisë, Albulena Haxhiu, ka thënë sonte se Kosova ka nevojë për një kryeprokuror të Shtetit që ka integritet profesional dhe që është i guximshëm.

Sipas saj, Kosova nuk ka nevojë për një kryeprokuror që e ka “bishtin e zënë me derë” sepse siç thotë ajo, po e merr në qafë një popull.

Ajo foli edhe për Blerim Isufajn, i cili tash e një vit nuk është dekretuar nga presidentja Vjosa Osmani, në pozitën e kryeprokurorit të Shtetit, transmeton Paparaci.

“Isufaj është kryeprokuror i Prokurorisë Speciale, kjo prokurori ka kompetencat më të mëdha sa i përket krimeve të luftës, krimit të organizuar dhe korrupsionit, shpëlarjes së parave dhe ku jemi ne në këto raste?”, pyeti ajo, përgjatë intervistës së dhënë në KTV.

Për Haxhiun, Isufaj nuk ka vullnet për t’i luftuar “peshqit e mëdhenj”.

“Së fundmi i përgëzoj për veprimet që i kanë ndërmarrë, duke qenë se ne e kemi mundësuar gjykimin në mungesë të kriminelëve të luftës ka lëvizje pozitive në këtë drejtim, por pse s’është vepruar më herët dhe pse ende dosjet e korrupsionit dhe krimit të organizuar mbahen në sirtarët e Prokurorisë Speciale? Pse ndërmarrjet publike kanë qenë në prag të falimentimit, kontratat abuzive nuk janë trajtuar asnjëherë seriozisht? Pse? Kush i ka ndalë?”, tha ajo.

Megjithatë, Haxhiu u shpreh se Kosova ka prokurorë që janë të guximshëm.

“Për këtë kemi nevojë ne. Ka prokurorë e gjyqtarë shumë të mirë në Kosovë, por ata nuk janë lënë asnjëherë që të jenë në nivele më të larta”, ka treguar Haxhiu.