Haxhi Avdyli: I ndjek dy modele në politikë, Ibrahim Rugovën dhe Vjosa Osmanin

Duke folur për listën “Guxo” që këtë javë u regjistrua në Komisionin Qendror të Zgjedhjeve, deputeti Haxhi Avdyli tha se njerëzit e kësaj liste janë persona që kanë dalë nga pakënaqësi prej LDK-së.

“Ne dallojmë edhe nga rruga politike që kam ardhur nga LDK-ja, nga një bindje tjetër politike, që në thelb e kemi presidentin Rugova. Jemi bashkuar me VV-në për çështje që janë joideologjike, korrupsioni, reformat në shëndetësi… Për disa tema që jemi bashkuar, jemi në rrugë të mirë. Dua të them që ‘Guxo’ nuk është themeluar që ne të punojmë kundër kësaj Qeverie”.

Sipas tij, zbrazëtinë e presidentes Vjosa Osmanit në ‘Guxo’ s’mund ta mbush askush.

“Zbrazëtinë e Vjosa Osmanit s’mund ta mbushim, në politikë duhet ta kesh një model. I pari është Rugova, i dyti Vjosa Osmani. Ndër virtytet e Osmanit është se është e pakompromis në luftimin e korrupsionit, nga kapja e grupeve të interesit dhe nga parapolitika. E ka identitetin e vet dhe e ka aftësinë e prezantimit të Kosovës para aleatëve të perëndimit. Kosova është në duar të sigurta me presidentes Osmani”, deklaroi tutje Avdyli.